Leggende sacre del ms. Ashburnham 395

1, MartaMarta hosta de Cristo fo fiiola de Suro et de ....charia he desendé lo pare de Marta [] fo duse de Suria he de la marina e de molte altre terre. Unde Marta cum Maria Magdalena serore soa aveano sì en soa parte Magdalu he Betania, ed ave una gran parte Martha de Ierusalem e non se trova che mae 'de 'la avesso mario né volese con homo conversare. Questei cum Maria Magdalena servia a Cristo, he il no ge paria che tuto el mondo fusse suficiente de servire a cotal hosto. Da po' che fata sì è la despersione di gi fieli, gi enfieli meté Marta he Laçaro he la Magdalena he san Maximino, el quale avea bateçà he erage comandae da spirito santo, he moltri altri en una navesela sença vele he victuaria, he metégi en mare, voiando che morise tuti. Ma igi, cum l'altorio de Cristo [ ] vene sani he alegri in li pertinencie de la cità che fi dita Aque, he vegnui començà de predicare he convertì quela çente a la fehe. E in quel tenpo era sovra lo Rodano en uno busco, e' quale era entro Arelathe e 'Vignone, uno grande serpente, el qual era meço bestia e meço serpente, maior de boe he plu longo de cavalo, che avea gi denti cum serave una spaa he agudi cum serave una segeta, he stava en questo flume e quase tute le nave che pasava ende elo li afundava. He era vegnù per lo mare de Galicia encendrà da Leviatar, e' qual hè serpento ferocisimo et habita en aqua, he da una bestia la qual fi dicta Hinogu, la qual bestia è in Galicia. He disese che poi quigi chi la caça ella buta l'insia soa bene una balestra lonçi, e ço che tocha questa insua ela brusa sì come farave uno fogo. Aldì questo Martha, he andè là o' habitava questa bestia he trovàla che 'la mandegava uno homo. Et tolle Martha de l'aqua sancta che l'avea sego he butàgene adosso e mostravage lo signo de la sancta crose, he alo' lo serpente stete sì como preso e vento. Unde Martha lo ligà cum la soa çintura he menàlo fora del busco; e lo povolo cum le lance, cum le spae, cum le balestre l'ancise en quel logo el qual enanci fieva dito Nerbar: de questo serpente, el qual fiea dito Tharascu, fo apelao Tarascona. En questo logo, de licencia de Maximino maistro soe he de voluntà de la Magdalena, Martha edificà uno monistero de done he habità iveloga en çençunio et in oratione. En questo monistero ela non mandegà carne né ove né formaio né cosa nesuna cum graso e guardavase da bevere vino. Una fia' mandegava al die, he cento venie facia al die he cento a la note. Predicando ela una visenda en Aviniono entro la citae e 'l Rodano, uno çoveno era ultra lo flume, e voglando vignire per aldirla né no abianda nave, el se meté a pasare nuo lo flume. Mae la força del flume 'lo ge tole sie la virtue ch'elo se negà. El segondo die cum gran pena trovà lo corpo, fu portà a Martha e metuo a gi pei soi. Unde Martha movesta a conpassione se meté in terra he orae cosie: «Misser Iesu Cristo, el quale susitasi Laçaro mio fratelo, guarda la fe' de sta çente che sta cercha questo corpo he resusitalo, doce hosto mio». E dito così, ela levà sue e prese lo fante per mane, et elo alo' levò sue sano e salvo e recevé lo sancto batesemo. Ambroso disse che Martha fu quela inferma che sanà Cristo dal fluxo del sangue. Unde, sanaa a lo tocare la finbra de le vestimente de Cristo, ella fé fare una immaginne a la forma de Cristo e metéla in lo verger soe. E disese che le erbe le quale nasea iviloga, quando elle tocava la vestimenta de quella ymagene, era molte vertuose, unde molti infirmi recevia sanitae per quele erbe. Aldù çoe Çuliano emperaore et apostata della fe' de Cristo, elo fé tore via l'imagine de Cristo e féie metere la soa en odio de Cristo he di gi cristiani. Mo elo vene un fulgore da cielo: tuta la ymagine de Çuliano apostata brusà come []. Voiando Iesu Cristo remunerare Martha de gi beni ch'ela avia fato, elo revelà a lei lo so transito un anno enanço. E en questo anno, abiando ela le fevra et altre debilità per octo die inanci ch'ela morise, ela vite fir portà l'anima de la Magdalena in çelo da i ançeli. Unde Martha congregà le soe sorore e altri frari, e dissige: «Frari mei e sorore mie, [] ch'io aie veçù portare l'anima de la sorore mia in celo. O dolce serore mia e dilecta, vivi con lo to maistro he mio hosto in vita eterna!». E sentando ch'ela aproximava a la morte, hela disse a le soe done ch'ele stesse presso a ela cum lucerne die e nocte enfina ch'ela passarave. Stagando quele che la guardava çircha ela e tuti, en la meça nocte hel vene uno vente et amorçae tute le lucerne che era iviloga. Durmando gi guardiani, ela veçando una gran conpagnia de demonij se meté in oratione digando: «Hosto mio caro, gi enganaori ènno congregai per devora'me, abiando en le mane soe scriti contra mie de cose ch'io fi' çae de vanitae. Unde, miser, no te lontanare da mie, ma sieme in alturio he defendime». E en questo 'la vite la serore soa vegnire da sie, et avea in mane soa una fasela apresa et enprendé tute le lucerne e gi cesendili. E clamando ela misericordia e tuti, Cristo vene e dissige: «Vieni hosta mia dileta, en quelo logo là o' eo habito habita he tu. E sì cum tu me recevisti asae fiae en la tu' casa, cusì eo te receve moe en cielo. He quigi chi te giamarà in soi fati, eo gi exaldirave per to amore». Vegnua la ora del transito soe, ela se fé portar fora açoe ch'ela vehese el celo, he fésse metere en la terra su çendere he la crose se fé metere su la faça e fé cotale oratione: «Hosto mio caro, habij cura de questa toa povereta, he cum tu dignassi albergare en lo halbergo mio, tu sì digna moe de recevereme indel toe». He dito çoe, ella se fé legere la passione de Cristo segondo Luca, he quando el disse: «Pare eo recomando el mio spirito en le mane toe», Martha rendé l'anima soa a Dio. Vegnù l'altro die en lo quale le muneghe le ge faeva l'oficio per sepelirla, Iesu Cristo aparse in l'ora de terça a san Frontonio veschevo de Petragoricha el quale cantava messa, e dissege: «Dilecto mio Frantonio, leva sue viaçamentre e ve'me drio se tu vòi complire la promixione che tu asi fata alla mia hosta». E Frantonio levà sue della carega en la qual digandose la pistola elo dormia, he andè poi Iesu Cristo. E vegnui entrambi in Taraschona, he fé l'officio al corpo he cum le soe mane la sepelie. Dita la pistola in la glesia de san Fantonio, li clerisi lo deseà açò ch'elo desse la beneditione al çagano che dovea dire lo guagnelio. E san Fantonio deseà ge disse: «Frare mei, perqué me deseave voi? Lo Segnore mio Iesu Cristo m'avea menae alla sepultura de Martha hosta soa, he noi entrambi l'avemo sepelia. Unde mandae viaço en quello logo uno messo, he fatime portare lo mio anello e gi mei guanti grisi, i quali eo rachomandà' al sagrastano quando eo m'aprestava de sepilire lo corpo he no gi domandae perché uno me disse ch'eo stava tropo». Fu mandà gi missi in Tarascune he così fo trovà come aveva dito lo

2, Maria MaddalenaMaria Magdalena da uno so castelo lo qual ave nome Magdalu sì fieva apelà Magdalena. E fo fiiola d'uno nobelo homo lo qual ave nome Siru e fo de sclata de rehe. La mare ave nome Heucharia. Morto lo pare, ella romaxe cum Laçaro so fraelo he cum Martha soa sorore, et avea quisti trihi una gran parte de la cità de Ierusalem e un castelo el qual avea nome Magdalu el qual era lonçe doa meia de Genesareth, he Betania la qual è presso a Ierusalem. E partì en tre queste cose, Magdalu vene in parte a Maria, he quelo de Ierusalem a Laçaro, e Betania a Martha. E cum Maria andase a solaço e çoghi e vanitae he Laçaro a cavalaria he a le cose del mondo, Martha regia la parte de Laçaro he de Maria he dava a intrambi ço che ge faeva logo e mistero, he a gi povri fasia multe elimosini. [] de Cristo in çelo, hi vendé tute queste cose he metéli preso a gi pei di apostoli. Stagando Maria en dilicihe né no atendando a Dio moe al corpo soe, ela se meté a fare male del corpo soe e con tanti ch'ela non fiea nomenaa se no per pecarise. Andando predicando Cristo per quela contrà, la Magdalena comovesta en so coro dal Spirito santo vene là o' el predicava, he entrà in casa de Simone livroso cum lo qual Iesu mandegava. He no holsando cumparire entro i altri sì como pecaris, andè dreo da la mensa a qual mandegava Iesu Cristo e metéssege a gi pei, e co li soe lagreme ge lavè gi pei he cum la bocha gi bassoe e cum gi cavigi gi sugoe, he ongiagi cum unguenti preciosi gi quali ella avea portà cum sie, ché li persone de quela regione per lo gran caldo sì usa de lavarse he unçerse de onguenti ch'i tegna resenti. Veçando çoe Simone, ello començà a pensar en cor soe e dire infra sie: «Se Iesu fosse profeta, helo cognoserave che femena fuse questa che lo tocha, he no se laserave tocare a una meretris». Unde Iesu, cognoscando lo penser de Simone, sì ge disse: «Symon, eo t'ò a dire una cosa». E Simon disse: «Maistro, di' ço che te plase». E Iesu respose e disse: «Uno usura' avea dui dibitori: l'uno ge devea dare cinquecento libre e l'altro cinquanta. No abiando quisti dui da render lo usurario []». E Simon respose: «Eo penso ch'è quelu' a chi ello à fato maior gratia». E Iesu disse: «Ben ae çuegao». E volto a la Magdalena, disse a Simon: «Vì' tu questa femena? Eo son vegnù en casa toa, tu no m'asi dae de l'aqua a gi mei pei, ma questa cum le lagreme soe m'i ae bagnà e cum gi cavigi soi m'i à sugai. Tu no me dessi pase, e da po' che questa vene çae ella no ae cessae de basar gi pei mei. Tu no me ungisi lo cavo mio cum olio, cum mo' questa sì m'à unto gi mei pei cum unguento. Unde perçò eo te digo ch'el ge fi remetui asai pecai perçò ch'ela ae molto amao». He po' disse alla Magdalena: «El te fi remitui gi toi pecai, va' en pase». Questa sì è quella Maria Magdalena a la qual Iesu Cristo fé molte gratie e doni speciali, che da ela el deschaçà un demonio. Elo in l'amor soe l'abrasae e in la soa familiarità la recevé, sua hosta la fé. Quando ello andava predicando, ela ge faeva li spensarie. Ello sempre dolcementre la scusava, e sì apreso lo fariseo lo quale la nulificava, e sì apreso Marta la qual de lei se lamentava, e sì apreso Iuda traitore el qual la reprendia de lo unguento el qual ela sparse sul cavo de Iesu. Questa hè quella la quale veçando Iesu plancer del fraello no se 'n poté contignire de lagremare e per chi amore el susità Laçaro, lo quale avia [] quatro die en la sepoltura. Questa sì è colei per lo chie amore Iesu sanà Marta dal fluxo del sangue ch'ela avia abiù sete agni. Questa è quela la qual seheva a gi pei de Iesu et aldia le soe dolce parole. Questa sì è la prima che poi l'asensione de Cristo fé penitentia solepne e charena. Questa è quela la qual no se partì da presso la crose de Cristo e vene la domane per tempo per onçere lo corpo soe. Questa sì è quela che non se partie dal munimento partendose tuti i altri. Questa è quela a chi Cristo in prima aparse da ch'el fo resusitao e féla apostola di i apostoli. En lo quatordeseno anno poi l'asension de Cristo, abiando gi çuei morto Stefano e scacà gi disipuli, igi se sparse per diverse regione di gi enfieli a predicare la parola de Dio. E siando inseme Maximino, Maria Magdalena e Laçaro so fraelo, Martha e Marçela soa servirise he Çerdamo, el qual era nasù cego ma fo inluminao da Cristo, gi enfieli meté tuti quisti in una nave che no avea vela né àncora né governo cum molti altri cristiani in mare, voiando ch'i morisse tuti en lo mare. Mo cum la gratia de Iesu la nave pervene cum tuti quisti a lo porto de Marseia e intrà tuti in la citae. No abiando alcun chi ge volese recevere in casa, hi se metehe soto uno portego del templo de questa citae per albergare. Veçando Maria Magdalena andar lo povolo per adorare le idole soe, ella ge fu enanço, e cum alegra faça, bele parole he gran fervore ela començà a prehicare Cristo he confortar tuti ch'i lassasse gi dei falsi e vani he credesso in Dio vivo e vero. Aldando la gent la Magdalena, hi se començae a maraviglarse de la beleça, de la sapientia e de la lingua sua. He no era maravigla se la boca che bassase cutante fia' i pei del salvaore parlava bene et ornamentre le parole de Dio. En questo vene lo principo de la cità e la moiere soa per oferire a gi demonij, açò ch'igi ge desse algun fiiolo. E la Magdalena ge desconfortà, mostrando per raxone no da gi demonii, gi quali no pò fare çoe, mo da Cristo, el qual hè verase fiiolo de Dio, se vole demandare questo e tute altre gratie. Poi arguanti die, la Magdalena aparse in visione a questa dona he dissige: «Cum tu e 'l to mario abiae tante richeçe he stagae en cotante delicie, perqué lasè voi morire i poveri de Cristo soto quelo portego da fredo e da fame? Se tu no indù' lo to mario a suvegnire, sapi ch'el te 'n prenderà male». Desseaa questa, ella ave paura de le parole de lo sonio, mo per paura del mario no ge lo osava dire. In la segonda nocte ancora la Magdalena g'aparse he dissige in tuto e per tuto come 'la avia dito la prima nocte, ma questa ancora per paura no 'la osà dire al mario. En la terça nocte molto per tenpo ancora gi aparse a entrambi dui cum un volto irao et cum una faça molto abrasà e parea che tuta la casa ardesse, e disse: «O tirano, dormi tu? Menbra del pare toe [] moiere, la qual no t'à volù dire le mehe parole! Posi tu, innemigo de la crose de Cristo, pleno de diversi çibi, e lasse mori' de fame gi servi de Cristo? Tu çasi en gran palaci, vestio de sede he de vari, e quî quatro sconsolai è quasi morti e no gi recogi! Malvasio e inigo, tu no lo averai de dono e non paserai suto, ché tu èi tanto induxiao a suvegnirge!». He dito queste cose desparse. Desveiaa, la dona 'la comencè a sospirare molto he, temando de manifestare el sopnio al mario, elo fo anch'el deseà he començà a sospirare. Unde la

4, BasilioEn lo tenpo de san Basilio lo qual era veschevo de la cità de Cesaria, Juliano emperaore de Roma, lo quale avea renegà la fe' de Cristo, andava in Persia cum gran cavalaria a cumbater cum quela çente la qual era revelaa a lui, he avea fato voto a gi soi dominedei che s'el vincesse, ch'ello ge farave sacrificio del sangue di cristiani. He vegnuo en le contrae de Çesaria, lo veschovo ge mandà uno presente de pane d'orço; Iuliano irao ge remandà feno. E vegnù lo veschovo encontra, l'emperaore ge disse: «Basilio, eo sì ò meio filosofao cha tie». E lo veschovo ge respose: «Voia Dio, emperaore mio, che tu apari savio». Disse l'imperaore: «Tu m'ài mandà del pane da bestie, et eo t'ao mandà feno». Basilio respose: «Emperaore, noi t'avemo mandà del pane che noi mangemo, moe tu m'ài mandao feno, lo quale no è se no per bestie». E Çuliano aldando queste cose: «De questo feno e no d'altro çibo eo te farae pasere! E s'eo torno cum victoria, eo destrurò questa toa çità he farò ch'el gi abitarà bestie he no homini. Eo so bene ch'è la baldeça la qual ae sto to povolo, de no avere adoraa la dea segondo ch'io avea comandao». E dite ste parole, cum grande turbatione se partie et andè verso le contrae de Persia. Lo veschovo Basilio tornà alla cità e congregà tuta la gente e cum lagreme molte narà queste parole. E planto una ora lo povolo, ello ge fé tasere e dège cotal consiio: «Signori mei, no habiae alguna cura de perder l'aver vostro mae abiae cura he pensero de poer scanpare le persone». He respondando tuti: «Molto ne plase, ordena de l'avere nostro cum tu vòi he de li aneme nostre»; «Vaa çaschuno a casa he meta la pecunia in sachi he scriva de sovra lo nome soe he metala en cotale logo». Andè ogn'omo he così fé. He fo congregao grande thesauro d'oro e d'argento he de pree preciose e dinari asae. E Basilio disse: «S'el tyrano tornerà venceor, noi ge faremo presentare questo tesoro açò ch'el si humilij enverso la nostra çitae. He se Dio e lla vergene ne vorà alturiare en altro modo, ogni homo torà el so sacho cum la pecunia». Poi çoe, ello ordenà a tuta clerisia e al povolo che devesse andare su uno monte el quale avea nome Didimo, en lo quale era edificaa una clesia a onore de la vergene. E siando vegnù tuti i omini e le femene e gi fanti piçoli iveloga, Basilio ordenà che tuti staese in oratione e çunasse tri die, açò che Iesu e lla soa mare ge dovesse scampare de mane de questo tyranno. Stagando tuta la çente in oratione e çunando, una cotal visione aparse a Basilio. Vete questo: una gran cavalaria era in un campo anplisimo e 'n meço de questa oste era una bella dona suso una gran carega, e quela dona disse verso gi principi soi così: «Manda' tosto per Mercurio, ch'io voio ch'elo vada in Persia he vendeghemone de Çuliano apostata, el qual blasfema lo fiiol mio Iesu he mie». E alo' Mercurio, el quale Çuliano avea morto per la fe' de Cristo e li chi arme era metue in la glesia de Cesaria, fo vegnù su uno bono destrero he armà de tute arme, e disse: «Madona mia, que comanda' voi?». E la vergene ge disse: «Vai viaço e tòi la vita a lo nimigo mio Çuliano». E Mercurio alo' se partie he çé despressamentre de chi a lo pavigione soto lo quale era Çuliano, e bassà la lança e passàlo de parte in oltra e gitàlo morto. Questa visione meesema vete un ch'avea nome Libanio de la conpagna de l'imperaore. E lo veschovo, veçando ste cose, fo deseao he viaçamentre se partì del monte cum lo so capelano he venne alla glesia en la quale era l'arme de Mercurio. E no trovandoli, giamè lo secrastano he dissige: «Ho' èno le arrme de san Mercurio?». E quelo ge respose: «Pare, elle era anchoi da vespro in quel logo ho' elle sole stare». E lo veschovo, dagando fe' a la visione, tornà al monte dormando tuta la çente e, fagi deseare, narà la visione a tuta çente. E dissige: «Eo v'anoncio che anchoi è morto lo malvasio tyrano», unde tuti començà referir gratie a Dio. He vegnù Basilio cum tuta la çente â logo là o' stasea questo martere, vete per certi indicij ch'ello era insio de la sepoltura e poi antrao, e le arme soe era retornae en quelo logo a o' elle solea stare, e vete ogn'omo la lança cum la quale 'lo avea morto l'emperaore. E Basilio ordenà c'ogn'omo se comunigasse e de qui a quatro die continuamentre fesse festa de questa gratia en honore de Iesu e de la vergene Maria. En lo quarto die, congregai tuti ensenbre, ecoti Libanio vegnando; narà e disse che, stagando l'emperaore soto el so pavione he guardando sete schiere de cavaleri, el vene uno cavaler el qual negun no cognosé subitamentre, e con la lança lo passè e alo' montè a cavalo e neguno lo poté vedere plu. E lo misero de Çuliano teribilementre crioe e disse: «Vento m'ài, Galileo!», e così criando morì. Narà etiamdio Libano tuta la vision soa e poi se butà a gi pei de Basilio he cum gran devotione ge demandè lo batesemo. E san Basilio lo bateçà he tollelo a vivere cumesso sie. Fato çoe, lo veschevo disse che ogn'omo vegnisse a tore la pecunia soa. E la gente respose: «Noi avemo ordenà de dare questa nostra pecunia a quelo tyrano perqué 'l no guastase la nostra çitae. E perqué no' tuncha no la dareme noi a Cristo et a la vergene che n'à scanpà e etiamdio vendegà de quelo chi ne volea destrure? Certo sì faremo. Unde, pare nostro, fa' de la pecunia quel che tu vòi per le anime nostre». E llo veschevo aldando çoe se dè grande maravigia de la fe' he devocione soa e laudàgi molto en çoe. E la terça parte rendé per força a çaschauno, de le doe parte ornà le glesie tute. Quigi d'Antioça, quando hegi aldì la morte de l'imperaor he cum el tyranno [], fé festa solepne per tuta la tera e en le plaçe: «Grande mato, ho' èno le toe profecie e gi toi indivinamenti? Vento ae Dio e vento ae Cristo!».

6.2, Preghiera 2 a Maria MaddalenaKi porà explicare, o bià e beneditta sposa de Dio Maria Magdalena, cum benignamentre Iesu responda o die per tie? Se oponia a quigi che t'inponea alguna calupnia; he cum pietosamentre ello te defendia dal superbo fariseo lo qual s'endignava contra tie, e com elo t'escusava alla toa serore la qual de tie se lamentava apreso lui, e como ello laudava la ovra toa fremando Iuda traditore contra tie! Que diròg'eo, cum diròg'eo, quando tu extuando del so amore lo çerchavi plançando a lo molimento, he ello più t'abrasava benignamentre e vertuosamentre mostrandose a tie e çelandose da tie? E como elo siando presente con tie, el qual tu çercavi, demandà da tie: «Que demandi tu? Que plançi tu?»? Mae tu, o pietoso miser, perqué domandi tu da ela perqué ela plance? No t'avea ela veçù ti, socorso he dolce vita de l'anima soa, crucificare e fir morto? Perçò ch'ela no t'avea posuo defendere ch'i no te alciese, ela volea almeno unçere el corpo toe ch'elo no inpurise. E cum ella no t'avese posù parlare vivo, ela volea almen plançere sovra lo corpo toe morto. E lo corpo to morto el qual ela creheva almeno aver, ela lo cré mo' avere perduo. E tu domandi qué ela plançea? O, cason de dare a i ogi soi lagreme! Ela avia vecù cum i ogi soi le crueltae che avea fato gi rei ministri, e lo corpo toe chi era romasa sperança de trovare era aduncha vià lei de trovare. E demandà alguno: «Que çirchi tu? Que plançi tu?». Moe almeno tue, singulare gaudio soe, perqué augmenti tu lo dolore soe? Tu savivi bene que ella domandava e perqué ela plançea, he ài voluo che ella così fesse; ello no te era ascoso l'amore soe lo qual tu ge spiravi. O misere, o benigno maistro, securi l'ançila toa feel, novelamentre redempta dal sangue toe, extua ansia de gran desiderio e amore toe! Ela guarda in çae e in lae e demanda de tie; en alguno logo no pare quelo el qual ella disira, ogna cosa la quale ella vehe ge desplase, enperçò che †elare solo† no vene. Perqué duncha sostene çoe lo signor mio, amigo soe? Miser mio, habi tu conpasione! Perché tu èi andao a lo stao de encoruptione, à' tu lasao la pietae? Perché tu ài trovao comortalitae, lonçi sea da ti, miser, questu, che no pò essere che tu sì fato mortale, perché tu fissi enmortale, unde la toa dilectione no se pò più ocultare da ela né sostegnire de manifestarse ha ela. Et enperçò nomenà el signor el nome dell'ançela soa, sì como ello era usao, e disse: «Maria», açò ch'ela cognossese lo segnor en llo signor soe. Unde eo creço, anço no ge dubito, ch'ela sentì quela dolceça la qual ella era usà d'avere quando ello la clamava per nomme: Maria. O vose delectabile, o quanto de dolceça, quanta consolatione ae sentia Maria quando ello la nomenae per nome! Ello no poté né più tosto né meio dire: «He' soe que tu èi he que tu vòi he perqué tu plançi. Ecutime, non plançer; ecutime, el qual tu demande». Amantinente le lagreme soe fu muae he no creço eo ch'ele fosse restrete né sechae, mo quele lagreme che butava el cor contrito e gramo de Maria mo' le butava fora el cor alegro e consolà de Maria. O cum de sumigenta he diversa parola fo: «Igi ae toleto el mio signor e no so là igi l'abia metuo. Crearà gi boni ch'eo hae veçù lo signor et àme dito cussì e cussì?». Ma que digo he expono eo, misera sença afectione he devocione, lo affeto de Dio e de la bihà amiga de Cristo? En que mou porà exprimer el cor meo lo bono odor del signor mio, cum ello no habia in sie savore bono? Ma tu veritae sai bene et èi mio testimonio, bon Iesu, che questo e' ò fato per amore del toe amore he per abrasare el cor mio del toe amore. Eo amo, miser, solamentre tie e desiro aver cor contrito he humile e darlo e offeri'lo a tie. He da'me, miser, en questa peregrinatione pane de dolor he de lagreme abundancia, la qual cosa eo desiro en questa vita sovra tute le richeçe che mai sia. Exaudime, misere, per amor e per gi gran meriti de questa toa dilecta amica Maria Magdalena, e de gi meriti e per la uvra de la biatisima mare toa grandisima Maria. No desprisiare, piatoso redenptore Iesu, lo prego e lla oracione de la toa indigna ançilla mae abije lo pensiere de la toa inferma amarise. Caça da nue lo turpore e 'l fredo di pecai he da'me l'amor e 'l fervore toe per la quale eo pervegna alla contenplatione de la faça toa in vita eterna. Amen.

8.1, Cattedra di PietroLa glesia fa tre feste a l'anno de san Piro apostolo. La una en lo mese de fevraro, e questa fieva dita gran Piero en carega. La segonda in lo mese d'agosto, e fi dita san Piero in vencholo. La terça in lo mese de çugno, e questa sì è de la soa passione. E queste tre feste sì è a mostrare ch'ello fo sovra gi altri apostoli previligiao en tre cose: che fo lo principo he maiore entro i apostoli, ch'el fo più fervente in l'amore de Cristo he ch'el fo de maior vertue hen far miraculi. Unde de lui se dise che a la umbra soa gi enfirmi recevia sanitae. Questa festa de la carega soa fo en questo mou he per cotal rasone. Preicando ello in Antiocia, Theofilo, el qual era signore de la çitae, sì ge disse: «Piero, per qual raxone vahi tu subortando lo povolo mio?». E Piero ge començà a manifestare de le ovre de Cristo e de la fehe cristiana. Unde Theofilo, tignando le parole de Piero per niente, félo metere in presone e comandà ch'el no ge fosse dà né da bere né da mançare. E siando Piero così stao plusor die e ça quasi mancando, ello levà gi ogi soi en cello e disse: «Jesu altoriaor di miseri, altoriame en queste tribulatione, ché eo mancho». E Cristo ge respose: «Crì' tu, Piero, esser abandonà? Se tu lo credesse tu farisi desenor alla mia bontà, ch'io ae prometù d'essere cum gi mei serviore en le tribulacione soe. Confortate, che tosto vignirà chi t'altoriarà». Unde Paulo apostolo, aldio che Piro era in presone, vene in Antiocia a Teofilio dagando a intenderge ch'el savea molte arti bone he utile in la corte de Theofilo, e llo pregà ch'el devesse habitare in la soa corte. E poi alguanti die Paulo andeo ocultamentre in la presone de Piero. E, trovàlo quasi consumato, començà a plançer amaramentre abraçandolo, e basandolo fiea quasi fora de sie. E disse a Piro: «O frael mio, gloria mia, mià del cor del corpo mio, respira e fa'te uno pocho de força en la mia visitacione». E Piro, aldio Polo, avrì gi ogi he cognosélo he començà a plançer ma no ge poté favelare. Unde Paulo cum un cortelo gi avrì gi denti he mitége uno pochi de bro' in bocha, sì lo revivò. Cumfortà, Piero abraçà Paulo e 'ntranbi planse una grande ora. Partì Paulo, ocultamentre andè a Theofilo e dissige: «O bono signore tu hè' molto corteso e bono, ma un defecto descunça molte gracie. Recordate, misere, que tu ae fato a quelo servo de Dio lo qual fi dito Piero, sì como s'ello fosse un posente umo he poesete nosere. E sapie, miser, che l'è uno homo povero, mendigo he de neguna posança; de parole ben è ello uno valente homo. El no dese metere in presone uno cotal homo. S'el fosse fora de presone forsi te porav'el çoare, ché sì como eo ae aldio dire el sana gi infirmi cum le parole soe e resusita gi morti». E Theofilo disse: «Queste cose, Paulo, sì èno flabe, che se ello poesse fare quel che tu die elo serave moe insù de la presone mia». E Paulo respose: «Sì como Cristo so signore resusità da morte he no volse desmontare de la crose, così Piero no se vole partire de la presone tua an' lo poess'el ben fare». E Teofilo disse: «Fa' tunca ch'el resusito el fiiolo mio lo quale hè morto ça se fa XIIJ agni». E Paolo tornà a Piero he dissige: «Pero, eo ae prometue a Theofilo che tu ie resusitarè lo fiiolo soe». E Piro respose: «Gran cossa he quanto a ti he a mie tu g'à' enprometua, mo quanto a Dio molto leve e piçola». Ensuo Piero de presone venne conesso Paulo he cum çente asae a la sepultura del çuvene. E fata oracione a Dio per Piero e respondù: «Amen» per Paulo, el çuvene levà sue veçando tuta çente. Unde Theofilo cum tuto el povolo d'Anthioçia se convertì. He batiçai, edeficà una gran glesia a honor de Dio e en la glesia meté una charega he fége seher Pero. Unde in Anthioçia Pero fo veschevo e pastore VIJ agni. E poi çoe vene a Roma he iveloga fo veschovo XXV agni. He de quello honore el qual ave Piero in Anthioçia la glesia fa anchoi festa, che da questo tenpo in çae gi prelati començà avere nome he tignir logo de signoria entro gi fideli. Fi altresì dito la festa d'anchoi festa de magnaria, enperçò chi gi antighi solea in tal die cum hè anchoi meter pane e vino e altre cose da mandegare sovra li sepolture di morte soi, creçando che le aneme mandegasse. E vegnia gi demoni e tolea tute queste cose per confermarge bene in lo eror soe. Unde, voiando gi sancti tor via questa usança malvasia, ordenà che sta festa della charega se fesse in cotal die. En questo tenpo fu cumençà che gi ministri della glesia portasse le clereghe. E predicando Piero in Antioça perché la çente creesse in Dio, igi prese Piero e 'n desenor del nome cristiano si 'l crostà en la cima del cavo. Unde vose gi pastore e i doctore de la glesia che quelo chi era fato al cavo di i apostoli per desenor, tuti gi clerisi avese he portase per onore he a gloria. E dì savere che en lo fato de la corona di clirisi tre cose se gi fae. El fi raso descurà a mostrare che entro lore he Dio non dé esser meço, mae dé esser conçunti cum Dio; a mostrare altressì ch'i dé aver mondicia in sie. E fino rasi en modo de cerclelo au d'una corona reonda a mostrare sì como la figura reonda né hà començamento né averà mai fine; e a mostrare che sì como la figura de la clerega no à algun cantone, cusì gi cleregi no dé avere alguna dupliçitae né en lo core né en le ovre soe. Ancora, en gi cantoni s'asuna senpre au polvere he scovalige, unde così com la corona soa no hae cantone alguno en lo quale se posa asumer luo né altro, cusì gi clirigi he gi riligiosi no doverave alguna macula avere né inmondicia in sie. Poi ge fé çunchare gi cavigi atorno he molto in alto a significare chi gi clerisi dé essere aprestà senpre a aldire le parole de Dio he dé removere tuti gi rei penseri e voluntae, he de le cose tenporale no curare alla necesità soa.

8.2, Pietro in vincoliLa festa d'anchoi fo ordenaa per quatro casone. Enprima a mostrare como Dio trase Piero de presone de Herodes. E fo en questo mou. Stagando Piero en la presone, vene l'ançelo de Dio en gran claritae e tocà Piero he deseàlo e disse: «Leva su viaçamenntre he çinçite he ve'me dreo». He incontanente le cahene ge caçì di pei he de le mane, he Piro fé ço che l'ançelo ge comandò he calcàsse e he vestìsse. E l'ançelo se metté inanço e Piro andè cum lui. E no savea Piero ch'el fosse veritae, ançe credea ch'el fosse insopnio. Pasaa la prima he la segonda custodia, vene a una porta de fero he allo' ella s'avrì per sì meesima. E entrai in la çitae, andè per una contraa de chi a un'altra. E l'ançelo en quela fia' se partì, unde romase Piero solo. E tornao in sie disse: «Mo' soe beno che Dio ae mandao lo so ançelo he àme trato de le mane de Herodes he de quele del povolo di çuei». E intenduo en qual contraa ello era, vene a casa de Maria mare de Çuane lo qualo avea nome Marcho. E en questa casa sì era molti di fedel, gi quali pregava Dio che Piero scanpase. E batù Piero a la porta, el vene una çovene la quale avea nome Iothe e, cugnoscando la vose de Piero, ela no g'averse de grande alegreça. Anço curse he disse a quigi de casa: «Piero hè alla porta». E quigi ge dise: «Tu matiçi, el no è vero». E questa confermando el so dito he Piero batando alla porta, igi andè he avrì l'usso. E veçuo Piero, disse gran maravigia; he Piero ge fé signo, e tasése. He stagando igi in silencio, el gi narà en que modo Dio l'avea trato de presone. La segonda casone perqué fo questa die ordenà, fo tale. Un prefeto de Roma avea in diverse presone Alexandro papa, el quale foe lo sesto pastore de la glesia poi san Piero, he uno che avea nome Hermeon, lo quale era stao senatore de Roma, ch'era convertì alla fe' per sto papa Alexandro. Unde una fia' questo porfeto vene da Ermio' e dissige: «Eo me do gran meravigia, cum tu sì un savio homo e sì stà senatore de Roma, che tu asi lasao la signoria toa he pari mo' sopniare un'altra vita poi questa». E Hermes ge dis: «El no hè gran tenpo che anch'io disea sì como fà' mo' tu e faevame befe de questa fe' di cristiani e no creava che fise vita altra se no questa presente, ma eo ae veçù per certo ch'eo raegava». E Quirino profeto disse: «Fa'me cognosere che sia altra vita poi questa, e eo me farò cristiano». E Ermes ge respose: «Alexandro papa el qual tu ae en presone te 'l mostrerà meio de mie, unde va' da ello». E Quirino blastemà Alexandro he disse: «E' ò digo a tie che tu me mostrasi se altra vita hè poi questa, he tu me mandi ha Alexandro el qual eo tegno in presone per maleficij soi! Unde sapij ch'eo doplicarò le guarde sovra lui he sovra tie [] una presone, eo crederò poe a le parole vostre». Fato çoe, hel fé asavere ha Alexandro questa condicione. Unde, orando Alexandro, el vene l'ançelo e portàlo en la presone en la qual era Hermes. E vegnù Quirino e trovàgi ensenbre, dèsene gran maravigia. E començà Ermes a nara' a Quirino como Alexandro avea resusità uno so fiiolo. E Quirino disse: «Eo aio una fiiola tuta fistoliaa. Se tu fà' ch'ela sana, eo me farò cristiano». He Alexandro ge disse []: «Cum tu sie moe en questa presone, s'eo no hae quela presone, como te ge troverav'eo?». «Va'» disse Alexandro «tosto, che quelui el qual me portà çae me porà reportare lae». E Quirino andè he Balbina fiiola soa menà a la presone d'Alexandro. E trovàlo, ella se ge butae a gi pei; basava le ferie soe. E Alexandro ge disse: «Fiiola mia, no basare le mie ferie mo fa' trovare le boghe de san Piero apostolo. E trovàle, basarà'le he così receverasi sanità conplia». Unde Quirino fé cerchare diligentementre en la presone en la quale era stao san Piero, e abiandole trovae ello le dè a basar a Balbina soa fiiola, unde alo' 'la fo sanaa entregamentre. E veçando çoe Quirino, el domandà perdonança a Halexandro papa he trasselo de presone, he cum tuta la famigia soa he altri asai recevé el batesemo. Unde Alexandro edificà una glesia a honor de san Piero he meté iveloga queste cahene e ordenà sta festa en cotal die che basà queste cahene per reverencia de san Piero. La terça casone de la festa d'anchoi fu cotale. Otaviano enperaore he Antonio, per muiere, avea partio l'enpero de Roma sì che Octaviano enperiava in ocçidente he Antonio in oriente. Moe Antonio, sì como home luxoriose, lasà la moier he tole la rayna de Egypto la quale avea nome Cleopatra. Unde Octaviano irà andè cum grande oste cuntra Antonio e vencéllo in tuto. He così Clopatra e Antonio fugì e de dolore s'ancise entranbi dui. He destruto lo regno de Egypto e spoliaa Alexandria, Octaviano entanto agressò l'imperio de Roma che quello che se dava enançi per quarto dinaro mo' se dà per uno dinaro. Unde Octavio dal povol de Roma fo apelà Augusto enperçò ch'elo avea così augumentà l'inperio e fata cotanta abundancia de roba. He da po' in çae, tuti g'inperaore de Roma fi diti augusti, sì como da llo avo soe che ave nome Cesaro tuti gi enperaori fi appelai cesari. Unde da questo Augusto gi romani apelano lo sesto mese de l'ano Augusto el qual inançi avea nome sestile. E en memoria de questa vitoria ogni ano en lo primere die d'avosto gi romani fa gran festa, he in onore d'Octaviano. E regnando Theodosio enperaore, Eodosia soa fiiola, moier de Valentiniano, andè in Ierusalem per vou ch'ela avea de çoe. Unde uno çoveno, voiando farge honore, dège quele cahene cum le quale san Piero era stao enferià en la presone de Herodes. Tornaa sta dona in Roma, he veçando quanta solepnitae faeva gi romani ha uno homo el quale era stao paga' he era dapnao, atendando che no se porave bene tore questa usança [], ave colatione cum Pelagio papa ch'el dovese trare lo povole a fare questa usança he festa. E plasando a tuta çente çoe, ella tole le cahene che 'la avea portae de Ierusalem he mostràle al povolo. E lo papa portà quella cum la quale elo era stao enferiao soto Nerone. E metua questa apreso le altre, adesso fo conçunte tute tre ensenbre e fone per virtue de Dio fata una. Unde lo papa ordenà che elo honore el quale se faea en questi tai die ha uno emperaor danao, se fese da chie inanço a san Piero apostolo. E la fiiola de l'enperaore dotà grandementre quella glesia.

8.3, Passione di PietroPero apostolo enfra gi altri apostoli fu de maior fervore a Iesu Cristo, unde el volse savere chi era quello chi dovea tradire Cristo, moe Cristo no ge lo volse manifestare perché Piero l'averave morto, e lo manifestà bene a Çoane. Piero andè †salica† per lo mare a pe' sego; fo di gi tri ellecti in transatione de Cristo; ave da Cristo le clave del regno celestiale; convertì a penticonste in la soa predicacione trea milia persone; a la unbra soa gi infirmi sanava. En questo tenpo era in Ierusalem uno mago el quale avea nome Symone. Questu' se faeva fiiol de Dio e disia che quigi chi crederave hi no morerave; questo faea serpente de ramo gi qual andava, faea le statoe de pria he de ramo rire. Piero contra questo se ponee he disea che 'lo era rio e falso. Unde un die fo ordenà una disputacione entro questo Simone he Piero apostolo. E vegnui ensenbre he desputao una grande ora, veçando Symone ch'el no poeva contrariare Piero, partìse de Ierusalem he andè a Roma hu' ello fieva tegnù quasi per Dio. E Piero, sapiù çoe, gi andè drio. Vegnù Piero a Roma en lo tenpo de Claudio enperaore, començà de predicare e convertire de la çente asai alla fe' de Cristo. E senpre in li predicacione soe laudava la vertù de la castitae, unde ello convertì quatro drue de Agripa lo qual era prefeto de Roma. Veçando Agripa che le soe drue no volea andare da ello, començà avere stomego a Piero. Poi çoe, Cristo aparse a Piero he dissige: «Nerone enperaore h. s[] he [ ] lo mio []. Unde Paulo [ ] Piero. He facta alegreça granda ensenbre, començà predicare la parola de Dio cum gran fervore. En questo miesemo tenpo Symon mago era in Roma he avea cum Nerone grande amistae, he Nerone credea quasi che Simone fusse mantignimento e so alturiaore a mantignirij e creçer Roma. Una fia', stagando Symone cum Nerone, el ge disse: «Enperaore, fa'me çunchare la testa he eo lo terço die resusitaroe, he così porà' tu savere per çerto ch'io sone fiiolo de Dio». E comandao çoe l'enperaore a gi soi carnifici, quelu', creçando degolare Symone, sì alçise uno becho e Symon per arte di demonij no avea alguno male. Unde ello tolle lo becho morto e sepelìllo e poi tri die ello se manefestà a Nerone he dissige: «Fa' lo mio sangue, lo quale çase in terra, tor via e lavare, ch'io sone resusitao sì como eo t'avea prometuo». Nerone veçandolo ave gran []ando Symone cum Nerone SymoneRoma disea che [] Paulo andè a Nerone he mustràge che l'era enganaore he reo. He disea Piero che sì cum in Cristo fo doe sustancie, çoè de Dio he de homo, così in Symone hè doe sustancie, çoè d'omo e de demonij. E vegnue Symone enançi Nerone, sì andòge Piero. E 'l disse: «Açò ch'io no abia più de questo Piero briga, eo comandarae a gi ançeli mei che igi lo toia de sta vita». E Piero ge disse: «Eo no temo gi toi angeli, ma igi teme mie». E Neron disse a Piero: «No temi tu Symone el quale mostra con le ovre ch'elo hè cum lo fiolo de Dio?». E Piero disse: «Se ello è Dio, digate moe quelo ch'io penso. E açò ch'ello no te possa enganare, eo te dirò çoe ch'io penso». E lo enperaore disse a Piero: «Veni çae he di'me ço che tu pensi». E Piero, andà a ello, dissige en la regla: «Fa'me portare uno pane d'orço ocultamentre». E reçevù lo pane, Piero lo beneì e metélo in la manega soa he disse: «Diga Symone, el quale se fa Dio, que eo ae dito he fato». He Symone disse: «Ançi diga Piero que eo penso». E Piero respose: «Signore, eo mostrarae bene çoe che Symone pensa quando eo farae contra çoe ch'elo averà pensao de fare». En queste parole, turbao, Symone disse: «Vegna cane grande e devore Piero!», E alo' per posança di demonij el vene molto grande cane he volea andare sovra Piero. Mo Piero ge butà enanço lo pane benedeto e gi cani començà a fugire. E Piero en quella fia' disse a Nerone: «Moe eo ài mostrà no con parole ma cum facti quelo che pensava Symone contra mie. Ello avea dito de fare vignire contra mie gi ancelli soi, hecuti ch'ello avea fato vignire cane». E Symon disse: «Aldio, Piero e Polo: s'eo no posso moe cuntra voi, nu' vegneremo a quel logo en lo quale eo ve çuigerai. Unde moe eo ve perdone». Per gran tenpo Symone començà a dire ch'ello poeva resusitare gi morti. Unde, morto uno çovene, Nerone clamà Piero he Paulo he Symone, e fo ordenà che quelu' el quale no poesse susitare questo morto fosse morto. Plaquando çoe a entranbe le parte, vene Symon mago al corpo he di soe incantacione fé tanto ch'el parea moverse. Unde el povolo començà a criare cuntra Piero he Paulo, e voleagi aproare. Moe, a gran pena fato tasere Piero quella çente, disse: «Segnore, se lo fante hè resusitae, fa' ch'elo leve sue, vaha he favelle. E ço s'el no pò fare, sapiae ch'elo hè engano. Unde partì Symon dal corpo, he cognoserì la veritae». Partio lo mago dal leto, el fante romase sì como denançi. E Piero, stagando da lonçi del corpo, se meté in oratione e 'l disse ha alta vose: «Fantino, in nome de Iesu Naçareno leva sue». E mantignente, veçando tuta çente, el fante levà sue e començà andare. E lo povolo veçando çoe volea lapidare Symone mago. Mo Piero contradigando: «No fae, ello basta asae ello essere vento, che confus è. El nostro maistro ne amaistrè che noi rendamo bene per male». E Symone disse: «Piero he Paulo, voi no averì quel che voi cercai e volì da mie, ch'io ve farò miei martiri». E y respose: «Vegnane quel che noi disiremo, moe a ti no sia bene alguno ché tu no die se no bosie e gran male». E Symone poi ço andè a chasa d'uno so disipulo el qual avea nome Marçelo he ligà uno grandisimo cane inanço l'uso he dissige: «Mo' vederà' tu se Piero el quale sole vignire da tie ge auserà vignire». Partì Symon, he Piero çunse e, fato el signo della crose, disligà lo cane; e llo cane, façando careçe a tuta çente, el començà a persequere Symone. He abiando çunte, e lo butà in terra et averavelo morto, moe Piero corse he comandà al cane che no l'açiesse. Unde lo cane no ge fé male alguno in la persona ma squarçàge tute li vestimente, sì ch'ello romase nuo. Unde lo povolo cum lo cane, he maximentre gi fantini, lu incalçà de chia a fora della çità si cum ello fosse uno lovo. E Symon per questo gran desenore stete tuto uno anno fora de Roma ascoso. Unde Marçello se fé disipulo de Piero he cum lui andava. Pasao un anno, Symon ancora fé tanto ch'el tornà en gratia de Nerone. E vegnù in Roma, convocà lo povolo he disse: «Sapiee che molto sono ofendù da Piero e Palo, entanto che sta çitae, la quale eo defendea infina moe, he' voiu abandonarla e voiu andare a stare omai in cello. Unde tuti quigi che me vorà veer andare in celo, vegna cotal die in cotal logo». Vegnù el die ordenà, el montà su 'na gran tore he, coronà de loro, butàse fora he començà a volare in alto. He siando Piero e Paulo he Nerone he tuta la çente de Roma hiveloga, Paulo disse a Piero: «A mie pertene orare he a ti cummandare, Piero». E Nerone disse: «Viriter homo hè Symon, ch'elo conplise cum le ovre ço ch'el dise cum la boca, moe voi si' dui enganadori». He Piero stagando in oracione disse: «Leva sue i ogli he ve' quelo fiiolo del diavolo com elo hè in alto». E veçuo volar Symone, el disse: «Piero, que indusi tu tanto? Conpli omai l'oracione toa he fa' ço che tu die fare. E sapij che d'i a pocho el signore ne clamarà a sie». E Piero disse: «Anceli del diavolo, eo ve sconçure per Iesu che quelui el qual voi

9.2, Passione di PaoloPaolo apostolo, poi la conversione sua, multe persecucione he tribulacione sustene, ché in la çità de Filippo fo batuo, metù in presone he cum gi pei in çepo, en Listro fu lapidà, hen Hichonio he Tesarlonica perseguì da malvasij homoni, en Ierusalem fu ligao e ferio, e poi molti perigoli de mare vene a Roma en le mane de Nerone. E no siando Nerone ben confermà en lo enperio de Roma e aldando che entra ello e gi çuei era controversia de la leçe he de la fe' de Cristo, unde el no curà moltementre hu' ello volea prehicare. E cusì Paulo andando per Roma predicando, asae çente el cognoscea e en gran reverencia l'avea. E multi de la corte de Nerone deventà soi amighi he recevé la fe' de Cristo; lo conseio etiamdio tuto de Roma ave grande opinione de lui. Predichando ello un die circha vespro en la sala de lo emperaore, un çuvene el qual ave nome Patroclo, chi era molto in gracia de Nerone, montà su una fenestra per aldire meio quel che discea Paulo, e adormençao hiveloga el chaçì he morì. Unde Nerone, aldio çoe, fu molte gramo. E Paulo, cognosuo per revelacione che Patroclu era chaçù e morto, disse a de quigi chi era hiveloga: «Andae e porta'me quel çuvene, el qual hè caçù de la fenestra he morto». E portà lo fante, Paulo orando el resusità e vivo lo remandà a l'imperaore. Aldando Nerone che Patroclu era vivo el qual ello avea veçù morto, ave paura e no 'l volse lasar entrare da sie, mae a li perfine a gi preghi di soi amisi féllo vegnire a sie. E vegnù, ge disse Nerone: «Patroclu, èi tu vivo?». E Patroclu: «Cum, enperaore, son vivo!». E Nerone: «Chi t'à fato vivere?». E Patroclu: «Miser Iesu Cristo, segnor de tuto 'l mundo». Irà, Nerone disse: «Tuncha Cristo viverà sempre he destruerà tuti gi reame del mundo?». E Patroclu ge respose: «Misser sì, cum tu die serà». E Nerone levà le mane he dège una galtaa he dissige: «Èi tu cavaler de quel rehe?». E Patroclu respose: «Sì son, missere, ch'el m'à resusitao da morte a vita». En quela fia' çinque donçeli gi quai stava sempre inançi Nerone ge disse: «Emperaore, perqué feri tu questo çovene, el qual te responde saviamentre he quello ch'è veritae? Sapij che etiamdio nui semo cavaleri de questo rehe». He Nerone turbao fége metere in presone an' i avese 'lo amà tropo inançi. Unde fé cercare tuti gi cristiani per Roma he faeagi duri tormenti. Entro i altri cristiani, Paulo ge fu menao enançi e Neron ge disse: «O homo, servo del gran rehe e mio presonero, perqué me toli tu gi mei cavaleri e asunigi apreso tie?». E Paulo ge disse: «No solamentre de Roma en asuno cavaleri, mo etiamdio per tuto el mondo, a chie lo re mio darà soldo el qual no vignirà mai a meno, e çamai no averà alguna endigencia né povertà. Se tu vòi esser subbieto a elo tu serai salvo, ché lo re mio ae tanta pusança che dé vignire a çuegar tuta çente e finire stu mondo cum fogo». Neron, aldando che lo re di cristiani devea destrure el mondo cum fogo, fu turbao e domandè che tuti gi cavalere devese fir brusai en çaschauno logo hov'igi fiesi trovai, e Paulo, sì como homo el qual fasea contra la corona, fiesse metù alla spaa. Fato questo comandamento da Nerone, tanta çente di cristiani fu morta che lo povol de Roma entrà per força a lo emperaore he disse: «Enperaore, mete mou he fine a questa alcigaia e tempera la toa sentencia de nui e de questi che tu alçij, he defende l'emperio de Roma». Unde l'emperaore timando comandò che nesun cristiano fiesse morto enfina ch'elo veerave meio sovra çoe, unde Paulo no fo morto. Un altro tenpo Paulo menà foe inançe al re []: «Mena' via questo encantaore he reo homo, lo qual mua i alimente di homini! Çuncha'ge lo cavo a questo mago! No lasae plu vivere!». E Paulo disse a Nerone: «Enperaore, poca via sustinirae pena e poi sempre viverae cum lo mio signore Iesu Cristo». He Neron disse: «Çuncha'ge el cavo açò ch'el sapia ch'io son maior del so ree lo qual no 'l pò defendere da mie, e poi sì veheremo s'el viverà senpre!». E Paulo ge disse: «Açò che tu sapij ch'io viverò senpre, da poi che serò morto eo me te mostrerai. E en quella ora porà' tu savere che Cristo hè signor de la vita e de la morte». Poi ste parole el fo menao a recevere la morte. E andà elo, el ge disse tri di cavalere che 'l menava: «Di'ne Paulo chi è sto vostro rehe lo qual voi cristiani tanto amae he volì per lui morir enançi cha vivere, e que cambio n'averì vui». En quella fia' Paulo ge disse de le pene de l'inferno he de la gloria de paraiso, unde igi convertì a la fee. Unde hi ge disse: «Paulo, va' libero o' te piase». «No plaqua a Dio, frare mei, ch'io fuça. Eo no son cavalero fugitivo, ma legitimo. [] stabele he alegra. Unde, alo' quando eo serae morto, el vignirà homini cristiani gi qual torà el corpo mio. He notae bene lo lugo, he domane per tenpo andarie lae he dirì a Thiro he Lucha mei disipuli, gi qual voi troverì [], che ve dobia bateçare». Digando queste parole Paulo a sti cavalere, el çunse dui cavalere gi quali mandava Nerone per saver se Paulo era morto. E voiando ello convertir an' questi dui cavaleri a la fee, hi ge disse: «Quando tu serà' resusità da morte nui crederemo en quela fia' a quelo che tu die. Mo' recevi quelo che tu ài meritao». Andando Polo en lo lugo en lo qual el dovea fir morto, el ave incontrà una dona cristiana la qual avea nome Plantillia. E questa inçenoglàse a le soe oratione cum gran lagreme, e Paulo ge disse: «Plantalia, famola de Cristo, enprestame lo velo toe el qual tu ài en cavo, açò ch'io me possa ligare gi ogli d'elo, he eo te 'l renderae tosto». E Plantillia aloe ge 'l porse molte voluntera. Unde quelor chi lo dovea alcire se faea befe digando: «Perqué dae tu a questo mago he rio homo lu to velio el qual hè cusì precioso?». Vegnui a logo de la pascione, Paulo se meté in çenoglone enversu oriente he levà le mane al çielo una grande hora horando a Dio he referìge gracie, he cum lo signo de la crose armà el pieto soe he disse: «Messer, en le mane toe recomando el spirto meu». E poi sença alguna tristicia destendé lo colo he recevé la corona del martirio, he disse a quigi fiele chi era hiveloga che higi stesse cum Dio. Abiando elo ligai gi ogly del velo de Plantillia e llo cavo, çuncà lo cavo dal corpo, en la lengua ebrahica nomenà el nome de Iesu aldando tuti. E no è meravigla, ché tanto g'era stà dolçe nome che ben çinqueçento fia' lo nominà en le soe pistole. En prima de la plaga sua ensì lacte, la qual sagì de chia su le veste de quel che l'ançise, he poi çoe ensì el sangue. En l'aier altresì aparse un gran splendore e del corpo ensì un grando hodore he suavisimo. He tornando endreo quigi chi l'avea morto, Plantillia ge disse: «Hu' avì vu' lasao el maistro mio?». E quigi disse: «El çase morto en la vale di gi canpione, he hà velao gi ogli cum to velo». E Plantillia respose: «No hè vero, ché pur moe Piero he Paulo, vestì de belle veste bianche, hè entrai in Roma ha man a mane, abiando en cavo belletisseme corone. Ecuti lo velo cruentao, el qual eio i avea prestao». Unde, veçù lo velo, multi se convertì he bateçae. Aldando Nerone queste cose, el ave gran temore he, congregà multi filosofi, parlava cum higi de queste viscende. E stagando cusie, ecuti Paulo

10, AndreaAndrea fo frael de Piero apostolo he un disipulo de Çuane Batista e menà Piero a Cristo imprima. Questo, poi l'asensione de Cristo maistro soe, andè in Sichia a preicare he Matheo in Migdonia. Mo quigi de Migdonia, refuando la predicacione de Matheo, preselo he crevàge gl'ogli he metélo en presone voiando alçirlo. De chi a piçolo tenpo aparse un ançelo a sancto Andrea he comandàge che l'andase da Matheo. He respondando ch'el no savea la via, l'ançello ge disse: «Va' a la riva del mare e 'n la prima nave che tu troverai entra». E Andrea, così façando, cum vento prospero pervene en Migdonia, he cum l'alturio de l'ançelo trovà la presone de Matheo he trovàla averta. Unde entrà dentro he, veçù Matheo, molte planse e, fata oracione a Dio, el rendé gl'ogi a Matheo; e andè in Anthioçia, he Andrea romase chialoga. Veçando questa çente che Matheo era scanpao, prese Andrea. E dagandoge quisti sì che 'l sangue da multe parte curea en terra, Andrea stava en çenoglone pregando Dio per igi he sì ge convertì a Cristo, e poi andè in Anthioçia. Un homo veio, el qual avea nome Nicholao, vene ha Andrea he disse: «Pare mio, he' ae çae setanta agni e senpre son stao engordo da luxuria he no me sai guardar. Alguna fia' portao el guagnelio de Cristo sovra mie perché Dio me scanpasse da questo pecao he niente n'i avi. Unde una fia', no recordandome ch'io l'avesse adosso, eo andava in un bordello, e quela femena alo' ch'ela me vite disse: 'Va' fora veio, va' fora che tu èi uno ançelo de Dio. No me tochare, no me aproximaro, ch'eo veço sovra tie meravige grande de Dio'; a queste parole stupefato eo me recordao ch'io avea sovra mie lo libro di guagnelij. Unde, ora per mie che Dio me toia questa passione he che eo possa esse casto». Ausie queste cose, Andrea començà de plançere he da terça de chi a nona orà per lui. E levao sue no volse mandegare, anço disse: «Eo no mangerai de chi a ch'io no saverai se Dio averà misericordia de questo veglo». Unde, çunao Andrea cinque die, el vene una vose he dissige: «Andrea, tu ài trovà gratia al veterano. Mae sì como tu ài çunà per elo et ài aflito el corpo toe, faça anch'elo cusì». Unde elo çunà meço anno pane he aqua, he poi, pleno de bone ovre, morì en pase. E vene una vose ha Andrea he disse: «Eo per le toe oracione ae guadagnao Nicholao, el qual eo avea perduo». Un çuveno disse en secreto all'apostolo: «Mia mare, veçandome bello, m'à requerio ch'io çasa cum ella. Eo no voiando çasere cum ela, m'ae acusao al çuese. Unde prega per mie ch'io no mora, che se vom' enançe lo çuese questo pecao de mia mare mai eo no dirò. Enanci voio morire cha ofenderla». Clamà el çoven al çuese, Andrea andè cum ello. E la mare, avertamente he cun gran constancia, acusà lo fiiolo ch'el la volea avere desonrà. Domandà el çueno se ço era veritae, el tasé e no volse enfamare la soa mare. E questa sovrastando a l'acusa, Andrea ge disse: «Crudelissima entro le altre femene he plu! Perqué vòi tu che per la toa enmondisia lo to fiiol mora?». E questa disse al çuese: «Misser, mio fiiol, da po' che volse fare questa cosa he no poté, sì è apoçao a questo homo». Unde el çuese irao comandà che 'l fante fiesse metù in presone de chi a ch'el pensarave che pena el dovesse avere. Mae orando Andrea, el vene un gran taramoto teribile el qual butà tuti quigi chi era hiveloga per terra. E poi ço vene un folgor da çielo he alcise quela mala femena. Unde tuti ave gran paura e pregava Andrea ch'i no morisse. He pregando l'apostolo per higi, el cesà lo teramoto he lo çuese crete in Cristo. Sceando ello in la çità de Niçea, el ge disse gi homini della terra che de fora da gi muri apresso la via era VIJ demonij gi qual alçieva quigi ch'andava ende. E l'apostolo gi fé vegnire in forma de cane veçando tuto el povolo, he comandàge ch'igi andasse en tal logo chi plu no dovese nosere ad alguna persona. Unde amantignente higi desparse e quela çente vegando çoe se convertì a Cristo. E vegnù Andrea a la porta de una altra çitae, un çovene fiea portà morto. E domandando ello de la casone de la morto sua, el ge fo dito che sete cani nigri era entrai in casa sua he avealo morto en lo leto soe. E plançando l'apostolo disse: «Misser, eo sae che higi hè quigi demonij che descaçae de la çitae de Niçia». E disse Andrea al pare: «Que me darae to s'eo resusito el to fiiolo?». Elo respose: «Neguna cosa eo ae così cara como ello, unde eo te 'l darò». E fata oracione da l'apostolo, el fante resusità e fo disipulo soe. Preicando Andrea en la provincia d'Achaia, elo ge edificae asae glesie e cunvertì lo povolo a Cristo. E entro le altre persone convertì la moier de Egea, el quale era consolo de quele contrae, he baticàla. Aldio çoe Egea, el vene en la çità de Patras e enduea gi cristiani per força ad adorare le ydole. E Andrea, abiandolo encontrà, ge disse: «El serave casone de ben fare che tu, el qual èi çuese sovra altri, cognossise el to çuese che abita en çielo he cognoscandolo adorarlo he despresiare le ydole». E Egea respose: «Èi tu Andrea el qual prehichi quela seta superstitiusa, la qual g'inperaore de Roma hà cumandaa che fia extraminaa?». E Andrea respose: «Gi principi de Roma no hà ancora cognosuo como el fiiol de Dio he vegnù en sto mundo he ae mostrà che gi vostri dei sì è demonij, he sì ae mostrà [] i omini fare contra la voluntà de Dio açò che, offendù, Dio no ge exalda he igi abia segnoria sovra igi enfina che igi siano en inferno». Egea ge disse: «Lo vostru Iesu preicando queste cose vane che tu mo' dij, gi çuei lo prese he crucificàlo». Et Andrea: «Per restauracione de la generacione humana Cristo sustene la crose, e noe per algun pecao soe». Egea respose: «Cum elo fosse preso da gi çuei he traio dal so disipulo, cum pòi tu dire che de soa voluntae 'lo morisse?». He Andrea ge mostrà che per voluntae he no per força el morie, «ché alo' el predise lo lugo en lo qual el volea morire, poi manifestà quel che 'l dovea traire, he predisse lo modo e lla forma de la morte sua. Unde sapij, Egea, che gran mistero hè quel de la crose, se tu 'l volise aldire». E 'l respose: «No se pò apelar misterio ma pena he tormento. Unde, s'tu no me consenti, eo te farò cerchare questa crose che tu laude cotanto». E Andrea: «S'eo temese la cruse, eo no la preicarave. Unde aldi lo misterio della crose he credo açò che tu recevi salvacione. Lo primer homo, çoè Adam, mandegando del fructo lo qual Dio gi avea vehao sì entrodusse en lo mondo la morte, he enperçò he' fu convegnevol cosa che Cristo sostignando la morte sul lignu de la crose la deschaçase. Altrisì lo primer homo fo fato de la terra vergene el qual fu prevaicaore, unde cunvegnevol cosa fue che de vergene

13, Giovanni EvangelistaÇuane apostolo, andai i apostoli per diverse parte del mundo a preicare, andè in Asia. E hiveloga convertì çente asae he molte glesie ge levà. Unde Dummiciano enperaor de Roma mandà per elo aldia la so numenança. E vegnù ello a Roma he no voiando consentire a quel che volea Domiciano, e' lo fé meter in una tina plena d'olio buiente enanço una porta de la çitae la qual fi dicta Porta Lahina. Mae Çuane per virtù de Cristo ne osie non abiando algun male, sì com en lo corpo soe el no avea abihù alguna policione ria. Veçando l'enperaur che per amor del martyro ch'el g'avea fato el no çessava anpo' de pregare, el sì 'l mandà in exilio en una isola qual fieva apelaa Parmos. E stagando en questa isola, el fé un libro el qual fi dito Apocalis, çoè libro de revelacione le qual Dio ge manifestà de molte cose le qual dé avignire en lo mondo. Voiando Dio revocare el so apostolo, lo enperaore fo morte per gran soa crudelitae e ordenà lo sena', çoè lo consigio de Roma, che ogna cosa che Domiciano avea fata fose revochaa, unde Çuane, lo qual en desenore era portà in confine, fosse retornao cum grande honore. Unde, vegnando ello en la cità de Efeso, tuta la çente ge vene encontra digando: «Benedeto quel chi vene en lo nome del signore». Entrando Çuane en la çitae, he Drusiana sua familiare fiea portà morta. Unde le vehove, gi povri he altra gente asae curse a l'apostolo he dissige: «San Çuane, nu' portemo morta Drusiana la qual fieva obediente a gi toi comandamenti he nu' tuti sustentava. Ela etiamdio pregava he molto desiderava che tu vignisi, digando: 'O, vederò ie l'apostol de Dio enançi ch'e' mora?'. Tu èi vignù, ella no te pò vehere». Aldio Çuane queste parole, el fé meter çue lo chaeleto he fé disligare el corpo he disse: «El mio signore Iesu Cristo te resusito. Drusiana leva su he va'ne a casa toa». He començà andare a casa soa he pensava de ço che g'avea comendà l'apostolo he parége ch'el no l'avese resusità da morte mae deseà del sopnio. Uno altro die un filosopho ch'avea nome Chatone avea asunà lo povolo voiandoge mustrar che sto mondo no era niente he devease desprisiare. E fé vignire dui fraegi carnale, gi qual era multi richi e avea vendù de voluntae de questo filosopho tuto 'l soe he cunprao arquante pree preciose, he fégele speçare tute veçando ogn'omo. En questo l'apostolo pasava per lo merchao. Sapiù quel ch'era quel che se faea, andè a quel filosopho he, andando tuti, mostràge che despresiar lo mondo en cotal mou no era bene: enprima, ché questo desprisiamento fi fato a vanagloria he nu per amor de Dio; poi, ché questo disprisiar no tole via el pecà de l'anima; e altresie, ché quel desprisiare hè bon quando l'omo desse a gi poveri. E lo filosofo respose: «Se Dio hè to maistro he vole ch'el fia dao lo valore de queste pree preciose a Dio, fa' che 'le vegna sane, he quel ch'io ae fato ha nomenança di gi homini fa''l tu a la gloria de Dio». En quela fia' Çuane cogì le peçole de le pree he metésele en le mane e, fata oracione a Dio, 'le deventà entrege sì como ele era enançi. Unde, veçù çoe, lo filosofo he quigi dui çoveni se convertì a Cristo he, vendù le pree, dè lo presio a gi povri. Dui altri çovene, veçue çoe, vendé tuto 'l soe he destribuèlo a gi povri he deventà disipuli de Çuane. Mae poi molto tenpo, veçando arguanti soi servi andar a cavalo he ben vestij he con çente drio sie, he sie esser mal vestij he poveri, començà stare grami he enpentirse de ço ch'igi avea lasao lo soe. E cognoscando ço l'apostolo clamàgi he dissige: «Andae he portàme dâ lio del mare de quele pree piçole he de alguna schia arguante vergele». He fato igi cosie, l'apostolo fé oracione a Dio he le vergele se muà in auro he le pree de lio in preciose pree. E l'apostolo dè queste cose a quisti dui fraegi he dissige: «Andae per tuti gi aurevesi he se queste hè bone pree preciose demandae he se questo hè bono auro, he poi me 'l fae asavere». E andai quisti per tuti quigi che savea de queste cose, ogn'omo discea che fin auro he fine pree era queste. Unde, tornai quisti a Çoane, gi ge disse: «Tuti ne dise chi no vete mai meior auro né meior pree». E Çuane ie rendé l'auro he le pree he dissige: «Andae he recovrae le terre he le case che voi aveva've vendue, sapiando che voi avì perdue el regno de celo. Sea' floridi açò che voi enmarçai en sta vita, açò che en l'altra scea' senpre poveri». E començà l'apostol prehicar contra li richeçe mostrando che molte cose hè che ne deverave retrar da tropo amar le richeçe: «La prima sì è la scriptura sancta ch'el vea». He disse lo exenplo del devése he de Laçaro. «La segonda la condicion nostra, che nui nasemo, nui andemo soto la terra. La terça le creature de Dio, cum hel sole, la luna, l'aqua, lu aere, la terra he lo fogo che engualmentre serve a gi omini. La quarta sì è che l'omo amando tropo le richeçe no hè signor mo servo de le richeçe. [] La sexta che le richeçe hè casone de perder l'anima he de molte superbie». E digando ste parole, el fiea portao un çuvene morto el qual avea menà moier mo' era XXX die. Unde la mare, che era veeva, he molti altri che 'l plançea vene a gi pei de l'apostolo he pregàlo ch'el lo resusitasse sì cum alo' avea fato Drusiana. E plançando l'apostolo cum higi he orando, el fante resusità. E cumandàge Çuane ch'el devese dire a quisti dui fraegi quanta era la gloria che higi avea perdua he quante hè le pene che higi avea meritae. Unde el disse: «O miseri, eo viti gi ançeli vostri plançere, he vite che voi avì perduo gi palasij belitisimi en celo fati de pree preciose he d'auru, tuti plini d'ogna gloria he habundancia de vitualie. E sì vite che là u' vu' devì andare el g'è oscuritae, verme, planto, confusione, he gi demonij orribele da veere he teribile da sostegnire». Audie queste cose, quigi dui e quel ch'era resusitao se butà a gi pei de l'apostolo digando: «Nu' te preghemo, pare, che tu ne trovi la gracia de Dio, he fa' che nui no andame mai en queste pene». E l'apostol disse a gi dui fraegi: «Andae he fae penetencia per XXX die continui he pregae Dio che torne le pree he le verçele en soa natura». Andai quisti he fata la penetencia, le verçele he le

14, Tommaso apostoloSeando Thomaso en Çesaria, Cristo g'apparse e dissige: «Lo re de India, el qual hà nome Gondofiro, à mandà un so meso per trovare un savio maistro de far palasij, unde vèi cum mie ch'eo te ge voio mandar». E Thomaso disse: «Messer, en ogna altra parte me manda, se no a quigi d'India». E lo signor disse: «Va' seguramentre ch'eo serae tua guarda. E como tu averai convertia quela çente, tu vegnirai a mie cum palma de martirio». E Thomaso respose: «Tu èi signore mio he eo te servo, sea tuto quel che te piaxe». Andando Cristo cum Thomaso per lo merchao he encontrao en lo messo de re, el ge disse: «O çuene, que vòi tu conprare?». E lo çuveno: «El me signore m'à mandà per trovare algun bon maistro de far palasij al modo di romani, ch'el vorave farsen fare un beletisimo». E Cristo disse: «Queste mio servo n'è maistro afilao, unde eo te 'l voio dare». E lo çovane, regraciando molto, tole Thomaso. He entrà hi en nave, andène entranbi; e vene quisti ha una çitae en la qual quel re faea le noçe de una fiiola soa. E perçò ch'elo avea comandao che tuti fosse a queste noçe, el fé mister che quisti andasse alla corte. E stagando Thomaso a la mensa he no mandegando ma tegnando i ogli al çelo, una çuglara, la qual era çuea he andava cum un enstromento cantando per la sala, ave cognosù che Thomaso era hebreo. Unde 'la vene enanço elo he començà dire cantando: «Un è lo Dio di gi çuei, el qual fé lo çelo he la terra he ço che dentro se contene». E l'apostol ge disse ch'ela anchora ne diese queste parole. Veçando el sescalco de le noçe ch'el no magnava he tegnia i ogli pur en çielo, fo turbao he dège una galtaa. E l'apostolo disse: «Eo no levarae da sta mensa che cane portarà chie quella mane che m'à ferio». Andè po' lo pincerna çoe per trar aqua he venne un lovo el qual l'alçise he, bevuo el sangue, andèsene. He vegnui poi gi cani he mandegando el corpo, el vene un cane negro he tole la mane del senchalcho he portàla en la sala vegando tuti, unde ogn'omo stete stremij. He sapiù da la ebrea quel che disea l'apostolo, tuti se butà a gi pei de l'apostolo e 'l re pregà ch'el beneise el sposo e lla sposa. E l'apostol disse: «Da', misser, la toa benedictione a quisti çoveni he semena en lo cor soe semença de vita». Andà Thomaso a lo albergo soe, lo sposo se trovà en mane soa un rame de palma pleno de datali. Mandegao elo e la soa sposa de sti datali, igi s'endormençae intranbi e vete cotal visione çaschune: el vignia un re tropo ben vestio he dissiage: «El mio apostolo v'ae beneiti açò che vu' abiae vita eterna». Desvegai entranbi he digandose l'ensopnio soe, l'apostol fo vignù en meço lor he dissige: «El mio re v'è aparso moe, he mie conducto hà da voe seando le porte he tute le fenestre serae açò che la benedicione mia frutifiche en vue. Voi avì la virginitae del corpo, la qual hè rama de le vertù he fruto de la salvacione eternale. La virginità hè serore di i ançeli, posereris de tuti gi bene, victoria de la inmondisia, expugnacion del diavolo he segurtae de le alegreçe eternale. De la luxuria nase polucione e poi ço la eterna dapnacione». Digando elo queste parole, el vene dui angeli he disse: «Nu' semo da Dio dài a voi per guardiani; he se voi serverì ben gi comandamenti de l'apostolo, noi porteremo a Dio le vostre oracione». E creçando higi, el ge bateçà he amaistràgi de la fe' diligentementre. Comandàgi a Dio, poi no gran tenpo la sposa che avea nome Pelagia reçevé martirio per Cristo, he Dionisio so sposo fo fato veschevo de quela çitae. Vegnù Thomaso he Abanes in Iudea, higi andè al re. E demandao Thomaso s'el savea lavorar ben palasij, el respose al re che molte bene, he recevé gran suma de pecunia per edificar questo palasio. Andà el re fora de la çitae per fati del regno, l'apostol tuto l'avere destribuì per gi poveri he en dui agni en gi quali el re era absente andè predicando la fe' de Cristo per lo povolo, he gran moltitudene convertì a Cristo. Vegnù el re he sapiù quel ch'avea fato Thomaso, el fu turbao ultra mou. Unde demandà Thomaso he Abanes el qual l'avea menà, he entranbi gi fé meter en preson in lo fondo d'una tore, he de chi a poco igi volea scortegare he brusare. En questo meço el morì el frael del ree el qual avea nome Gad he fieage fato un sepulcro nobilisimo. En lo quarto die questo morto, el qual fiea guardà da molti, veçando tuti levà sue. E abiando tuti paura he fuçando molti, el disse al fraelo: «Questo homo el qual tu asi en preson, frael mio, he vò'lo scortegare, hè amigo de Dio he tuti i ançeli ge serve. Unde dui de lor me menà en paradiso he mustràme un palasio beletisimo el qual era lavorà d'auro e de pree preciosiseme, he meraviglandome de cusì bel palasio, hi me disse: 'Questo palasio hè quelo el qual Thomaso avea fato al fraelo'. E digando mie: 'Mo' poese pur eser portinaro de sto palasio!', hi me disse: 'To fraelo se n'à fato endegno. Se tu vòi stare en elo, nu' pregheremo Dio chi te resusito, açò che tu 'l posi conprare he render gi dinari a to fraelo, gi qual ae spendù Thomaso'». He dite queste cose corse a la presone he començà a pregare Thomaso ch'el perdonase al ree e, despoiàlo de quela vestimenta luosa he vile, pregàlo ch'el tolese altre vestimente bele. E l'apostol ge disse: «No sae tu che quigi chi vole avere poestà en cielo no desira alguna cosa carnal né terena?». Partio elo da l'apostolo, ecuti lu re he butàsegi a gi pei soi demandando perdonança. E disse l'apostol: «Gran gracia v'à fata Dio mostrandove le cose soe secrete, unde creì in Cristo he recevì lo batesemo açò che voi abia' parte en lo regno eternale». E disse lo frael del re: «Eo ae veçuo el palasio che tu aveve fato a mio fraelo he ae meritao de poerlo conprar». E l'apostol: «Questo sì è en poestà de to fraelo». E lo re respose: «Questo †siera†, e l'apostol te 'n farà un altro, e s'el no poese, sea to he meo». E Thomaso disse: «Palasij ennumerabile hè en vita eterna aprestai dal començamento del mondo, gi qual se conpra per lo merito de la fee, he cusì fia de le elemosene. Le vostre richeçe pò andare enançi ma no ve pò vignire drio». Poi un mese, l'apostol fé asunar tuta la çente de quela provincia e, congregàgi, el fé stare gi debili he higi enfirmi da una parte. Fata oracione sovra higi he resposo: «Amen» per quigi chi era ça amaistrai, el vene un flantiso da çielo he butà sì l'apostol sì tuta l'altra çente en terra, he durà ben per meça ora che tuti pensà esser morti. Poi çoe, l'apostol se levà he disse: «Sta' sue, che 'l mio signor hè vegnù sovra de voi sì cum flantiso». He levà tuti sani, començà laudar Dio he honorare l'apostol. Unde el gi començà a maistrare he dire che gi gra' de le vertù hè XI . E disse che 'l primo gra' sì è creer en Dio el qual hè una substancia he deitae hen tre persone. E de ço ge 'n dè tri exenpli. Lo primo che en l'omo hè una anima he no plue, he en quela anima sì è inteleto, voluntae he memoria. El segondo exenplo sì è che en le vie sì è legno, la foia e 'l fruto. Lo terço che in lo cavo hè V seni, çoè lo veer, aldir, odorar, tochar he gustar. He queste V cose hè in cavo he no

15, BartolomeoBertholamio apostolo, vegnù in India la qual hè en la fin del mondo, entrà entro un templo en lo qual era un demonio ch'avea nome Astaroth, e chialogha començà a stare sì cum peregrino. E sceando questo tenplo pleno d'amalai, questo demonio el qual era en la statoa no dava algun resposo a gi prevei sì cum elo era usao, né sanava algun de quisti amalai. Unde gi prevee, mandà en un'altra citae per saver da quel idol, el qual avea nome Berith, per que cason el dio soe Astaroth no dava algun resposo, he Berith ge respose: «Lo vostro dio sì è ligà de cahene de fogo he no ausa respirar né parlare da poi che l'apostol de Cristo el qual ae nome Bartholomeo vene en la çità vostra». He quisti disse: «Chi è questo Bartholomeo?». E lo demonio resposo: «Elo hè amigo de Dio homnipotente he vegnù hè en sta provinçia per descaçare tuti gi dei de sta provincia». E questi disse: «Di'ne le ensegne de questo homo açò che nu' el posamo trovare». E lo demonio: «Elo hae gi cavigi nigri he crispi, lo volto blancho, gi ogli grandi, le narise enguale, gran barba, pochi cavigi canu', de meça guisa hè grande, he la veste soa hè blancha he hae en çaschauna extremità pree preciose. Vinti he VJ agni hè che questa vestimenta né gi sandalij so' no enverise né deventa soçi. Cento fiae en die he cento la nocte ora Dio ençenoiandose. Gi ançeli de Dio va cum ello he no 'l lasa faigare né avere fame. Sempre elo hè alegro he de un volto. El sa ogne cosa he vé quel chi dé avignire. E intende ogne lenguaço e parla en ogna lengua; elo sa moe ch'io parlo cum vue. S'el vorà manifestarvese, vu' el troverì, he s'el no vorà, voi no 'l troverì. Eo ve prego che quando voi l'averì trovao, che voi ge digae ch'el no vegna en sta çità, açò che gi ançeli no me faça quel che l'à fato al conpagno mio». Turnà questo a casa he çerchàlo per dui die, un endemoniao cumençà clamare: «Bertholamio, apostol de Dio, le oracione toe me brusa». E l'apostol disse: «Tasi he esi via da elo». E lo demonio alo' se partie he fo quel sano. Aldio çoe el re de sta contraa el qual avea nome Polimio, el mandò una soa fiola la qual era lunaticha ha elo pregandolo che la sanase. He vegnù l'apostolo he veçandola encaenaa ch'ela sobiugava he squarçava tuti quigi ch'ela poea piglare, l'apostul disse: «Eo tegno ligao el demonio el qual era en lei. Perqué avì vu' paura?». E alo' quando ela fu desligaa, ela fu conpliamentre sanaa. E partio l'apostol del palasio, el re fé charegare camili d'auro he arçente he pree preciose he mandàlo a l'apostol. E vegnù gi missi, el ge disse: «Perqué m'avì vu' tuto anchoi çercao cum questo auro he arçento? Queste done hè mester a quigi che va cerchando queste cose mondane, mae eo no desiro alguna cosa terena». He no volse reçever alguna cosa. He fato al re una granda he bela predicacione el ge disse: «Se tu vòi creer en Cristo he bateçarte, eo te mostrerao ligao el to dio cum chaene». Vegnù l'altro die, sacrificando gi prevee ha un ydolo el quale era apresu el palasio del re, lo demonio començò criare he dire: «Cesai, miseri, de farme sacrificio, açò che voi no habiae peçu. He sapiae ch'io son ligao de chaene de fugo da i ançeli de Cristo, el qual crucificà gi çuei. Mae elo, cuntra la creança di çuei, enpresonà la morte, la qual hè nostra raina; he lo nostro principo, el qual hè mario de la morte, ligà de chaene de fugo». Aldio çoe, la çente chi era hiveloga meté soghe al colo de la statoa voiandola trare a terra, né no puté. Unde l'apostol comandà al demonio ch'abitava entro ch'elo ensisse fora he tuta la speçase. E lo demonio ensì fora, he questo idolo e tuti gi altri chi era an lo tenplo speçae. E poi çoe orà a Dio he sanà tuti gi enfirmi, he quel tenplo consecrà en onor de Cristo he comandò al demonio che andasse en lo deserto. Partiose el demonio, el vene l'ançelo de Dio e segnò lo templo en quatro parte digando: «Sì cum eo ae mondao he sanai tuti vue, cusì eo ae mundae questo tenplo da ogna cosa he da ogne enmondisia he da la segnoria del demonio el qual habitava dentro elo, e voiovel mostrare quentro elo hè. E açò ch'el no posa noser ha algun de vue, çascun se faça el signo de la crose en la fronte soa». He fato çoe, hi vete un sarasino negrisemo cum la faça agusa, cum gi cavigi longhi de chi a gi pei. He avea igli ogli de fugo he butava per gi ogli sintile de fogo. Per la bucha butava bucà de solvere he era ligà de chaene de fugo. E disse l'ançelo: «Enperçò che tu fosse obediente ha l'apostol he speçase le statoe de questo tenplo, eo te desligarae. Mae vae en tal logo hu' no habita algun he sta' hiveloga de chia al die del çuisio, che no posi noser a persona alguna». Dito ço, lo diavolo cum grande strepito se 'n partie. He l'ançelo de Dio, veçando tuti, montà en cielo. E lo re cum la raina he tuti gi fiioli he cum tuto 'l povol se bateçà. Unde lo re, metù un en so logo, lasà el regno he deventà disipul de l'apostol. Fato questo, tuti gi prevee de le idole se congregà al frael del re el qual avea nome Astrages, he lamentàse de Bartholameo digando ch'elo avea desfati gi tenpli de gi dei soi et avea convertì el re cum arte magiche. Unde lo re Astrages mandà mile homini armà per prender l'apostul. E menaoge denançi, el ge disse: «Èi tu quelu' che asi pervertio mio fraelo?». E l'apostul respose: «Eo no l'ae pervertio ma convertio». E lo re ge disse: «Sì cum tu à' sì fato mio fraelo lasare el so dio he adorare lo toe, così eo te farae abandonare el toe he adorare el mio». E l'apostol: «Eo mostrae a to fraelo el dio soe ligao he fi'lo ensir de la statoa he speçarla. Unde, s'tu pòi fare così del mio Dio, eo adorarae el toe. E se eo speçarae gi toi dei, cre' tu al mio». En queste parole venne un messo al re he dissige: «Meser, el dio nostro Baldach hè chaçù he roto en peçe». E lo re, aldio çoe, squarçà la porpora ch'elo avea indosso he fé batere duramente de bastoni l'apostol he comandà ch'elo fosse scortegao vivo. Fato çoe, gi cristiani tole lo corpo de l'apostul he cum grande honore lo sepelie. Lo re he gi vischovi ch'avea ordenà questo male, fati endemoniai, morì a mala morte. He lo povolo constituì Polimio so veschevo en lugo de l'apostul. Creçando elo el povol sanctamente XX agni, el morì plen de vertue he sancte ovre. Poi ço gi pagani, veçando che 'l corpo de l'apostul per multi miraculi ch'el faea fiea habiiù en grande reverencia, hi tule el corpo e meté

16, Matteo EvangelistaMatheo apostolu, vegnù en Ethiopia en una cità la qual fi apelaa Vadeher, trovà dui magi hiveluga, çoè Çatohen he Alfaxath, gi qual cum forte arte privava çaschaun homo chi volea de mane an' de ...e, de qual menbro higi volea, sì che igi no se 'n poeva altoriare più, cum si no l'avesse. He quando gi volea sì 'l sanava, unde en tanta superbia era muntai che igi se faea quasi adorare per dei. Mae Matheo, desmontao en casa de quel eunucu el qual avea bateçao Filipo, tutu quel che faea questi magi el destruea he descuvria. E questu eunucu demandà Matheo: «Unde hè questo che tu sai he parli en cotante lengue?». E Matheo: «Questa vertue avemu noi apostuli da Spirito sancto. E covignevol cosa è che, sì cum quigi che volea edifichare una turre la qual tucasse el çelo, sceando d'una lengua deventà de plusor he no se poes endendere l'un l'altro, he perçò lasà de hedificare la tore cumençà, cusì nu' apostuli posamo entendere he parlare en tute lengue açò che posamo hedificare una ture spirituale per la qual tuti quigi chi creerà in Iesu possa montare a vita eterna en çielo». E 'n queste parole el vene un el qual disse: «El è çunti gi magi cum dui dragoni, i qual fugo de solfer butava per le buche, he quelur a chi vene de quel fugo caçe morti aloe». Unde l'apostul se fé el signo de la crose e çége encontra. He hi dragone, alo' chomo hi vete l'apostolu, higi se ge butà a gi pei he cumençà durmire. E l'apostulo disse a gi magi: «Hu' hè la vostra arte? Deschaça'i, se voe poì! Se eo no avesse pregao al me' signor per voi, quel che voi volese fare a mie serave vegnù a voi». He cungregà el povolo, l'apostul cumandà a gi dragoni chi se partisse he no fesse male ad alguno. He andai via gi dragoni, el ge cumençà a dire del paradisu deliciano, he disse ch'elo hè en lugu altissimo sovra ogne monte he che en quel lugo no nasse spine né urtige né alguna herba rea e che hiveloga hè le rose he çi çigi he mai no marçise çamai. No se envegisse l'umo né more, ma sempre sta çuvene. Le auxele che iveloga habita, alo' ch'ele fi clamae ele vene: «De questo paraiso l'omo fu chaçao per lo pechao, ma per la natura de Cristo he per la pasione nu' siemo menà en lo paraiso çelestiale ch'è maiore asae». Parlando el queste parole, el sonà un remore entro la çitae del fiiol del re [], açò ch'i susitasse questo çuvene. He no pusando igi discea: «Misere, el fiiol toe hè andao in numero e in la cunpagna de gi dei». E lu eunuchu del re fé prendere gi magi he vegnire l'apostulo. E vegnù elu he fata oracione sovra el fante, el resusità aloe. Unde el re, ch'avea nome Hegisippo, mandà per tute le provincie soe digando: «Vegnì he vehì Dio en forma do homo!». Vegnua çente cum corone he done asae, voleage sacrificare cum a Dio. E Matheo no lasae, digandoge: «Que volì vu' fare? Eo no son Dio, ma servo de Iesu Cristo». Unde, de voluntà de Matheo, de quel auro he arçente che igi avea portao igi 'difichà una gran glesia en honor de Cristu he en XXX die la cunplì. E lo re cum la raina he cum tuto el povol recevé lo batesemo. E una fiiola del re, qual avea nome Evienia, reçevé velo de stare en verginitae da l'apostul, he bene dusente altre donçele, le quale volea servare verginitae, fu dà ha ela en corpo he en maistà. Morto el re, Hircano fo levà re he desiderà avere Envienia per muiere. He Matheo ge disse: «Va' domenega die sì cum faea lo to predecesur a la glesia he hiveloga audirasi come bona cosa è 'l matremonio». Vegnù el re a la glesia sperando che l'apostul volçese Engenia al matremonio soe, he seandoge altresie questa vergene, l'apostol molto bene parlà del matremonio. E laudà dal re, hel disse al povol: «An' sia bono el matremonio, hel hè meiore l'aver la verginitae. E s'el fuse algun de servi del re lo qual volese violare la sposa del re, serave digno de morte. Unde tu, che èi re tereno, cum vòi tu né alsi dire de voler quela la qual hè sposa de Dio omnipotente he cumsegrà ha elo?». Lo re, aldio çoe, turbà molto se partì. E l'apostul, no temando lo re, cumençà confortare lo povol he beneì Hepigema, la qual de gran paura era butà enanço gi pei de l'apostul he tute le cumpagne soe. E conplia la mesa, el demandà un so becaro, el qua' ferì l'apostul de Dio de dreo, stagando elo en oracione cum le mane a cielo, he çungàge lo chavo. Aldio ço, lo povol volea corere a la casa del ree he brusarlo cum tuto el palasio soe. Mo gi prevee de Cristo he i altri ministri no ge lassà andare he sepelì el corpo de l'apostul cum grande honor. Poi çoe, el re mandà done e persune asae per indure Hepigenia che 'l tollese per mario. He no voiando ela consentire, el fé fare un gran fugo atorno la casa de Pigenia voiandola brusare cum tute le verçene ch'abitava cum ela. Ma l'apostul g'aparse he cumfortàla ch'ela no avese paura, he tuto el fugo deschaçà da la casa soa, e andè la flama a palasio del re e tuti brusà 'delo palasio cum ogna cosa; solo el re cum un so fiiolo scanpà. E lo fiiol del re, arepto dal diavolo, curse al sepulcro del pare. E lo re, fato levroso, veçando ch'el no poea guarire, sì meesmo cum un gladio s'alçise. Veçuo çoe, el povol fé so re un frael de Epigenia, lo qual era batiçà da l'apostulo. E questo regnà LXX agni en lo temore de Dio. Lasà lo regno ha un soe fraelo, e questo grandementre amplià la fe' de Cristo per tuta Ethiopia he molte glesie ge hedificà.

17, Simone e GiudaSymone he Judas fu fraegi de Jachemo Menore he fiioli de Alfeo. Judas andè en la çità che fi dita Edissa he mandàgelo san Thomaso poi la asensione de Cristu. E questa fu la casone che 'l re de questa çitae mandà a Cristo, vivando elo, una cutal epistola: «Abagaro fiiol de Euchario ha Iesu salvator bono el qual hè aparse en le contrae de Ierusalem, salù. Eo ae aldio de tie he de le sanitae che tu fae, che çença meesine he herbe le fasi. E aldio ae che cum le toe parole sole tu fae veere gi çegi, gi asirai andare he gi morti resussitare. Unde, per tute queste cose che ae aldie de tie, eo ae en cor mio fermao che de doe cose una n'è de tie, che au tu eo Dio vegnù de çelo a fare queste vertue, au tu èi fiiol de Dio. E perçò te prego per queste literre che tu te digni faigarte de vignire de chia a mie he sanarme de la enfirmità mea, la qual e' ò sostegnù ça lungo tenpo. E sapie che aldio ae altresie che gi çuei te va ensiando he mormora contra tie. Unde vèi a mie, ch'io ae una çitae piçola mo ampo' honesta, la qual basterà ben a noi entranbi». E Iesu ie respose en questo mou: «Bià èi, perché tu ài creto en mie no abiando veçù me, ch'è scripto: 'He chi veerà no crerà'. De ço che tu m'à' scripto che vegna a tie, eo no ge vignirae, ch'el me fa mister en queste contrae conplire tute quele cose per le quale eo sun mandao. Mo quando eo serà' montà en çielo, eo te mandarò algun di mei disipuli hel qual te sane he vivifiche». Veçando Abagaro ch'el no poea veere corporalmente Iesu, el mandà un pentore da lui che veesse Iesu he portasege la faça sua penta, voiando elo veerla almen penta, quel ch'el no poea veer en carne. Vegnù el pentore a Iesu, el no poea ben affigurare per molto splendore el qual ensia de la faça sua, né no savea como la poese pençer. Unde Iesu, cognoscando çoe, fesse un drapo de lino al pintore he metéselo su la faça sua he enpremé per la vertù de la divinità soa en quel drapo la sua ymagine he figura; mandàla al ree. El dise Çuane Damaseno che Iesu Cristo ave gran sovracigi, boni ogli, lungo volto. Montà Cristo en çielo, Thomaso apostul mandà Judas, el qual fi etiamdio dicto Thadeo, a questo re Abagaro. E vegnù elo al re he digandose esser disipulo de Cristo he vegnire da sie segundo ch'avea prometù el disipul soe, Abagaro guardandolo per la faça vete un splendor divino ensirge de la faça. Unde, stupefato tuto, adorà lo signor he disse: «Verasiamentre tu èi disipul de Iesu fiiol de Dio, el qual me prometé de mandareme un di soi disipuli soi che me sanerave he vivificherave». E Thadio disse: «Se tu creerasi en lo fiiol de Dio, tu averai tuto quel che tu desiri». E Abagaro: «Eo creço verasiamentre en elo e molto volunter desperderave tuti gi çuei gi qual el crucifichà, s'eo poese he no temesse gi romani». E Thadeo batiçàlo, he cum la letera la qual g'avea mandà Iesu fregàie la faça; elo fo amantignente sanao, he fi dito ch'elo era levros. Abiando Iuda el qual fi dito Thadeo preichao en Mesopotamia he en Ponto he Simone en Egipto, igi se conçunse entranbi ensenbre he andè en Persia. E hiveloga trovà Çaroes he Afarsath magi, gi quali era fugì de Ethiopia dal con...to de Matheo apostul. En questo tenpo Baradac duse del re de Babylonia andava contra quigi d'India. He voiando savere da gi dei soi que serave de sta bataia, no poea avere alguna responsione. Unde el mandà al dio de quela çità chi era da visino per savere que era la casone che lo dio soe no ge respondea. E fuge respondù che per gi apostuli de Cristo, gi quali era vegnù lae, gi dei no ge poea respondere. E trovà i apostuli, el ge disse: «Unde si' vu' he per que casone si' vui vegnù çae?». E gi apostuli: «Se tu domandi de la nostra contrà, nu' semo hebrei. Se tu domandi perqué vegnui nui semo, nu' semo vegnui per la vostra salvacione». E lo dux disse: «Quando eu serae tornao cum prosperitae, eo ve aldirao». E gi apostuli: «No te serave meio cognoser quelui per chi alturio tu poise vinçere gi ennemisi toi au far cum igi pase?». E Baradac disse: «Vu' si' maiore de gi nostri dei, sì cum pare a mie, unde predi'me de questa bataia que debia esser». E gi apostuli: «Açò che tu veghi che gi toi dei hè bausari, nu' ge dagemo liçencia che i responda». E alo' gi soi ministri començà a dire che gran bataia devea esser, he morire molti da l'una parte he da l'altra. E i apostuli començà de rire. Unde el duse disse: «Eo son enpaurio tuto he vu' rihì!». E i apostoli: «No avere paura, che la pase hè vegnua çae cum nue. Unde, domane cercha terça vignirà gi missi de quie d'India he farà la voluntà toa». E gi prevei de le idole cumençà a rire forte he disse: «Meser, no crer a quisti pestilenti homini, gi quali hè vegnui çae per asegurarte açò che tu chaçi en mane de gi enemigi». E i apostoli: «Nu' no avemo dito che tu aspeti un meso ma pur un die, e dumane serasi vençaure». E lo dux respose: «Eo farae guardare he vu' he gi mei prevei he, cusì como vignirà, ve farò l'onore au desenor». En l'altro die, como avea predite i apostuli, vene gi missi de quigi de India he en tuto fé quel che volse el dux. Unde Baradach volea brusare gi dei soi mae i apostoli vehà ch'el no 'l fesse, digando: «Nu' semo vegnù en sta contraa no per dare morte mo vita». E lo dux ge disse: «Almen toì tute le possesion sue». E i apostuli niente volse tore. Unde Baradach gi menà al re he dìge: «[] s'ascuse soto abito humano». E abiandoge narà en presencia de quigi dui magi tuto ço ch'avea fato he dito i apostoli, gi magi per envilia disse al re: «Meser, quisti dui homini hè maliciosi he enganaore, unde sutilmentre te vol enganare». E lo dux disse: «Serì vu' ardij de desputare cum higi?». E gi magi disse: «Se tu vòi cognosere che igi no porà parlare en nostra presencia, fa' vegnire denançi nue avocati eloquentissimi, he s'i porà favelare enançi nue, cre' poe che nu' no volemo alguna cosa». Vegnù avocati asai he parlente, alo' cum igi fo en lo conspeto de quisti magi hi deventà sì muti che né cum lengua né cum signi no poea parlare. E disse gi magi al re: «Açò che tu sapij che nu' semo dei, nu' ge dagemo liçençia de parlare, ma volemo ch'igi no possa andare». E fato cusì, hi disse: «Nu' ge dagemo licencia d'andare, ma volemo che abiando igl'ogi averti hi no veça». He fate tute queste meravige, lo dux menà quisti avochati da gi apostoli mal vestij; hi gi desprisià en cor soe. E Symon ge disse: «Sovente fiae avene che en begi scrigni he dorai hè vil cose, he 'n bruti scrigni è molte preciose cose. Unde, chi vole avere alguna cosa no dé guardare de fora ma dé veer quel ch'è dentro. Unde prometìne che vue abandonarì le idule he adorarì Dio envisibile

18, Mattia e Giuda IscariotaMathia fu metù da gi apostoli en logo de Iuda, el qual traì Cristo, en questo mou. Veçando Piero che 'l numero di apostoli era inperfeto, voiando'l conplire, disse entro gi fiele: «Frare mei dilectissimi, el nostro signore ne elese XIJ a preichare le fe' soa, ma Juda traditore hè morto he no è stà digno d'eser cum nue. Unde el è bene che nu' metamo algun altro en logo de Juda, el qual debia predicare quelo ch'à fato Iesu entro nue e testimonio esser cum nue. Unde algun de quisti che hè stai cum nue ne convene eleçere». E plasando ço a tuti, igi tole dui di setanta dui disipuli, çoè Iosep el qual fiea dito iusto he Mathia. E orando a Dio disse: «Misser, tu che cognosi ge cori de tuti, mostra qual te plase de quisti dui esser en logo de Juda». E metue sorte entro quisti dui, la sorte vene sovra Mathia. E cusì da chi enanço fu en lo numero he en la conpagnia di apostoli. No creça per ço gi fiele che liçita cosa sia moe a metere sorte. La istoria de Iuda traitore segondo chi se trova fu cutale. En Ierusalem fu una femena la qual ave nome Çiborea. Questa una nocte, stagando cum lo marì, si adormençà he vete un sonpno lo qual molto la enspaurì. Unde, disceà ella, lo disse al mario cum lagreme he suspirij, digando: «Eo ae veçù che enparturia un fiiol malvasisimo he rio, lo qual era casone de la perdicione de la çente nostra». E lo marì ge disse: «Tu parli cose mate he ree e creço che tu èi matia». E la moier respose: «S'eo serae gravia e eo farae fiiol masgio, eo creerai ch'el sia veritae he no mateça». Andando el tenpo, ela aparse gravia he, enparturì un fiiol mascul, el pare he la mare de Juda cumençà avere ranchura de sto sonpno he pensar que hi devese fare de sto fante. E abiando orore d'alçir el fante e no voiando che per ello la çente soa devese perigolare, hi fé una caseta e, metuolo dentro, butàla en lo mare. E lo mare el portà en una isola la qual fiea dita Scharioth. Seando vegnua la raina de ste contrae per spaciare cum le donçele soe a questo lugo he veçua sta casela, ela la fé tore he avrire. He veçù questo fante, cum ela no avesse algun fiiol, ella sospirando disse: «O, se avese un cotal fiiol he no perdese la suçessione d'un cotal reame!». E fé tore ascosamentre questo fantino, el qual era molto bello, he félo norigare. Poi ço, ella s'enfense de parturire he andè la numenança per tuto el regno che la raina avea enpartorì un fiiol masculo, e gi principi cul povol ne fé gran festa. Unde el re tole questo fante, creçandolo esser so fiiol, he félo nurigare segondo ch'a lu' desea. Poi no multo tenpo, la raina cum veritae s'ingravià he partorì un fiiol. Cresù questo fante he Juda altresì, igi çugava ensenbre he andava ensenbre. Ma Iuda faea molte fiae questo fante plançere he ferialo. Unde la raina, veçando çoe he sapiando che Juda no era so fiolo, molto l'avea per male he sì 'l batea speso. Ma no cesando perçò Juda de ferire el fante, la raina manifestà el fato al re he fu sapiù. Juda, abiando gran vergogna de çoe, turbà multo, metése contra el fiiol del re e alçiselo. Unde daa fu sentençia contra; Juda scanpà he vene in Ierusalem he metése a stare en la corte de Pillato. E Pilato, veçando che Iuda era pro' he saçento, félo seschalco he maiore de tuta la corte soa. He stagando un dì Pilato su lo palasio soe, ello ave veçù en un orto pome molto belle. Unde, vegnùgene gran voluntae, el clamà Juda he dissige: «Heo ae tal voluntae de quele pome ch'el pare quasi ch'io mora s'eo no n'ae». Unde Juda andè alo' a quel orto, he era questo orto de Ruben el quale era pare de Juda. Ma né Juda cognosea el pare, né Ruben cognosea lo fiiol. Toiando Juda de quele pome, he Ruben fu çunto he començà de criare contra Juda de ço ch'el tolea le pome soe. E vegnù da le parole dure a gi fati, Juda ferì lo pare cum una prea entro la çontura del cavo cum lo colo. Portae le pome a Pilato, Juda narà a Pilato ço ch'elo avea fato. Vegnua la nocte, Ruben andè in lecto he la doman fo trovà morto. E no abiando algun signo de infirmitae, fo crete ch'el fosse morte a subitana morte. Sapiù ço Pilato, el dè tuto quel de Ruben a Iuda he dège per muier Çiborea, la quale era moier de Ruben he mare de Juda. Conplì le noçe, poi un bon tenpo, Çiboria, stagando en lecto cum Juda, cumençà molto sospirare. E Juda ge disse: «Que ài tu?». E Çiboria respose: «Eo sonto dolorosa he misera più de le altre femene, che un fiiol meu e' ò perduo en cotal mou e lo mario trovae morto subitamentre; hae dolur sovra dolur, che m'à fato Pilato che per força m'à marià cum tie». E Juda, fatose dire tuta la enstoria del fante che ela avea butà en mare, he ditoge ello como ello fu trovà en mare en cutal logu he en cotale tenpo, hi cognoscé entranbi che ela era soa mare he Juda so fiiolo. Unde Juda, al conforto de la mare, andè a Iesu Cristo he domandàge misericordia he consiio. Unde Cristo el fé so disipulo he de disipolo sì 'l fé apostul soe, e poi lo fé so procuraore he de tuti i apostoli. Ma elo, seando reo he laro, e envolava de quel che fiea dà a Cristo. [] g'avea sparso quel precioso unguento sul cavo, murmurà he fu gramio de ço, digando ch'el valea tresento dinari, perché el volea aver abiù quelo unguento he venderlo per aver involao alguna cosa de quigi dinari. Unde elo andè he vendé Cristo per XXX dinari d'arçento e poi, desperao, s'apicà per la gola. He, morto, crevà per meçu el ventre he ensìge tute le buele.

21, Tommaso di CanterburyThomaso fu de la çità che fi dita Canturia, de la provincia d'Anglia. E stagando ello en la corte del re d'Anglia, veçando ch'el se ge façea cose che no era bone, partìsene he andè a stare con lo arçiveschovo de Canturia. E no poi multo tenpo lo arçiveschovo el fé so arçiçagano, he de voluntae he a gi preghi de l'arceveschevo reçevé la cançelaria del re açò ch'el poesse contrariare a molti rei homini chi era contra la glesia. Unde, vegnui a stare con lo re d'Anglia, ancora lo re cutanto l'amae che, morto l'arçiveschovo, el lo fé metere en logo soe. E, an' no 'l volese Thomaso, a multa enstancia del re he d'altre persone el consentie. Fato arçiveschovo, subito el muà tuta la vita soa en meio. Unde començà afliçere el corpo soe cum çeçunij, vigilie he oracione. Portava no solamentre en logo de la chamisa çiliçio, ma etiamdio le camise de ganba avea de çeliçio, e queste cose faea sì oculte []. Avea altresì queste usançe che ogno die el lavava gi pei a XIIJ poveri stagando en çenoglone he davagli da mançare, e 'l dava a cascauno quatro dinari d'arçento. Lo re poi un tenpo volea ch'el consentisse a certe cose a le quale avea consentio gi soi predecesor en mal de la glesia soa. Unde, no voiando consentire ello, lo re he gi baron soi ge començà a voler male. Una fia' lo re clamà l'arçeveschovo he plusur altri veschovi del regno soe he metégi en un lugo del qual hi no poea curtesementre partirsene. He fatoge etiamdio manaçare de le persone, l'arçiveschovo, a consigio no bon de arguanti grandi homini, cum le parole consentie. Partì elo dal re he veçando che questo consentimento era en male de l'anima soa he de le altre, se ne dè de çoe dura penetencia he astenese da la mesa, che lo papa el restetuì. Poi ço, lo re mandava che elo confermase en scripto quelo ch'ello avea dito cum la bocha. Ma l'arçeveschovo avertamentre disse ch'el non farave alguna cosa he, a cruse levaa, partìsse de la corte del re. E molti de la corte del re començà criar poi ello digando: «Prendì el laro, apicha' lo traitore!». Unde dui grandi baroni he feeli vene a ello cum lagreme he per asdito he per sacramento ge disse che multi gran baroni avea çurao ensenbre d'alçirlo. E l'arçiveschovo, sapiù la veritae, temando plu per casone de la soa glesia cha de la persona, ocultamentre se 'n partie he andè en Fiandria. Lo re, aldio çoe, mandà soi missi alla corte de Roma per trovar quel che volea, ma lo papa no ge volse pur aldire. Unde el re fé tore tuto quelo de l'arçeveschovo he spulià tuti gi parenti sohi, e fé çurare tuti quigi ch'avea anni de discriçione che igi anderave ultra mare he presenteravese a lo arçeveschovo, el qual era andao ultra mare. Poi questo, a molta enstancia del papa he manaçe, en lo septimo anno de la soa perigrinacione, 'lo el lagà tornare a la soa glesia. E fuge revelao da Dio ch'elo firave reçevù cum grande honore he vignirave a elo cum palma de martiro. Vegnù elo, el fu reçevù cum grande honore da la clerisia he dal povolo. Enfra questo tenpo, un fante el qual era morto resusità he tornao al corpo disea: «Eo fui menao en çelo de chia al sovran ordeno di sancti he vite una bella seça voa hiveloga, e domandando mie a un ançelo de chi era quela seça, el me respose: 'Ela fi reservaa da Dio ha un gran prevee d'Anglia'». Un prevee era en l'arçeveschovao de questui, el qual ogne die çelebrava messa de la verçene. Unde, acusao, vene enançi. E l'arçeveschovo, sapiù la veritae, el privà de chi a un tenpo ch'el no poesse çelebrare. E lo arçeveschovo meté el çiliçio soe soto el leto soe voiando farlo cusire. Unde la verçene aparse al capelano he dissige: «Va' he di' a l'arçeveschovo: quela dona, la qual cusì el çeliçio soe cun sea rosa, ela ge manda a dire ch'el te dobia restituire a lo to officio». E fata la anbasaa he trovà cusì el fato, l'arçiveschovo se 'n dè gran meravigla he retractà l'enterdicto he pregà el prevee che l'avese questo facto oculto. Vegnù in la seçe sua e voiando el re cose ch'el no dovea da lui, el stete constante he né per prego né per manaçe declinà. Unde, veçando gi amisi del re la sua constança, ordenà d'alçirlo. E un die vene una mane d'omini armai he cumençà criando dire: «Hu' è l'arçiveschovo?». Elo ge vene encontra he disse: «Ecutime. Che volì vu'?». E quisti: «Nu' vignemo per tore la vita». Elo respose: «Aprestao son de morire per Dio he per la iustisia he per la libertae de la glesia mia. Unde, se voi demanda' mio per alçire, he' ve cumando da parte de Dio omnipotente he soto pena de scomunegasone che voi no dobia' noser ad algun di mei, he eu recomendo a Dio et a la vergene he a gi sancti de çelo he a san Dionisio la mia glesia he mi enstesu». He poi ste parole, un lo ferì he tole la corona del cavo he la çervela se sparse su per lo batuo de la glesia. He cusì andè a Dio per via de martyrio. Voiando gli clirisi direge messa he sepelirlo, he abiando cumençao: «Requiem eternam», el vene i ançeli he enterunpé questa messa he cumençà quella d'un martyro. Unde gi clirighi andè po' dreo he conplì la messa del martyre. Una dona d'Anglia desirava avere i ocli vari per parer plu vaga, unde fé vou a san Thomaso che, s'el ge fesse questa gracia, ela visiterave el sepulcro soe. E stagando ela en oracione, 'la no vete alguna cosa. Unde, enpentia molto de la soa mateça, començà pregarlo ch'el ge rendesse la vista he no ge desse ogli vari, e a pena cum molti preghi Dio ge rendé el vehere. Una gaça che savea favelare fiea encalçaa da un spalivero, unde ela començà a dire sì como ela avea enpresu: «San Thomaso alturiame», e lo spalivero alo' caçì morto.

22, SebastianoSebastiano fu de Herbona he çitaino de Milano he fo sì amao da Diocliciano he Masimiano enperaore de Roma, che hi l'avea fato capitaneo de la prima scera he volea ch'el stesse senpre enançi sie. Questu' era perfeto cristiano, ma celavase en altro abito açò ch'el puesse revocare gi martyre de Dio ch'el veea mancare en gi tormenti. Unde, un tenpo en lo qual Marçiliano he Marcho nobeli homini dovea fir degolai per la fe' de Cristo, el vene a lor el pare he la mare he le muier cum gi fiioli per retrarge da la fe' de Cristo he dal marturio. E començàge a dire queste parole la mare: «O dolçi fiioli, gran miseria he dolor me tene. O misera, e' ò perduo dui fiioli gi quali enstissi va a morire. Se gi enimisi gi tegnisse prisi, eo andarave po' lur entro per l'osto. S'el ge fiesse força, eo speçerave la presone ben che devese morire. Mae questo hè un bel mou de morire, ché voi pregae lo becharo ch'el v'alçiga! Volì morire, he no vivere!». Poi la mare vene lo pare enfermo he disse: «Eo son vegnù per salvare gi dolçi fiioli mei, gi qual per força va alla morte. O mi misero, quel ch'io avea aprestà de spender en la mia sepultura eo spenderò en la vostra! Oi fiioli mei, sustentamento de la veieça mia he plancto mio, perqué amae voi così de morire? Vegnì çoven'omi çae he plançì sovra gi fiioli mei, gi quali vole morire per voluntà propria! Vegnì voi vegi he plançì cum mie gi fiioli mei! O ogli, deventai çeghi açò che voi no vega' la morte di fiioli mei!». Poi questui, vene le moiere cum gi fiioli en braço criando he plangando: «O dolcij marij, a chi ne lasae vue? Chi averà cura de questi fantini? Chi partirà le vostre grande possessione? O duri de core he plu cha pree ensensibile, gi qual desprisiae gi vostri parente, descaçae gi amisi vostri, no cura' de moiere he gi fiioli vostri, he metìve en mane de quigi che v'alçiga!». A queste cotal he cotante parole he lacreme, quisti dui fraegi començà de moverse he de voler quasi lasar el martyrio. Unde Sebastiano, el qual era chialoga he haldia he vehea queste cose, se manifestà enançi tuti ch'ello era cristiano. He disse: «O fortissimi chavalere de Cristo, per gran vertue voi sie vegnui de chi a la corona de martyrio he mo' volì vu' per miserelo segno perderla? No voia' perdere la vostra gloria per chative losenghe. Questa çente no cré ch'el sia altra vita se no questa. Se higi savesse ch'el fosse un'altra vita en la qual non se morisse he no s'avesse algun dolur, mal né desplaser, higi se faigarave cumesso nu' de trovarla he questa averave per niente. Questa vita fuge he no se pò tignire, questa vita dal començamento del mondo in çae si hà enganà quigi che se fidava in ella, he vegnua hè a menu a quigi che g'à creto. Questa vita dise a l'omo che l'invol, ch'el menta, ch'el luxurie he ch'el toia de l'altru' tuto ço ch'el poe. Ma le persecucione che ne fi fate per la fe' de Cristo he per amor de vita eterna anchoi cumença he domane hà fine. Ma lo dolor eternale mai no averà fine he senpre se renoverà». E dito ço a quisti dui fraegi, hel se volse a gi parenti he a le moiere he disse: «No ve temì che igi no habandona, me vene enanço per aprestar mansione eternale en çelo». Digando Sebastiano questo he molte altre parole, Çoe, ch'era moier de Nichostrato en la chi casa era quisti prisi, aldando queste parole se butà a gi pei de Sebastiano he no pusando parlare enperçò che ella era staa muta bon tenpo, cum signi demandava perdonança. He veçando Sebastiano ch'ela avea cognosua la veritae, disse: «Sì como sun verasio servo de Cristo he queste cose ch'i' ò dite, le qual questa femena hae aldie, hè veritae, avra Dio la bocha soa he deslighi la lengua soa he parle». He la femena alo' crià he disse: «Beneto el parlare toe, ch'io ae veçù uno ançello che tene uno libro enançi te, en lo qual era scrito tuto quel che tu disivi». Lo mario de Çoe, veçando la muiere sanaa he dite queste cose, se butà a gi pei de Sebastiano he pregava ch'el ge trovasse perdonança de Dio, he dissige che igi andesse liberi hu' gi plasesse. E igi ge disse: «Nui no ne volemo partirse he perdere la corona nostra». Unde tanta vertue dè Dio a le parole de Sebastiano che no solamentre el confortà Marçelino he Marcho, ma sì convertie el pare ch'avea nome Tranquilino he la mare he la moier, gi quali tuti batiçà Policarpo prevee. E Tranquilino, el qual avea una greve enfirmitae, fu tracto sano del batesemo. Aldio ço Gromacio, ch'era profeto de Roma, mandà per Tarquilino he, sapiù como elo era sanà, disse: «Eo te prego che tu meni çae quel, che sane an' mie». He vegnù da elo Sabastiano he Policarpo, el gi pregava che igi ge desse sanitae. E Sabastiano disse: «El te fa mester enançi abnegare tute le idole he darme puestà che nu' le speçame tute». E Gromatio respose: «Gi servi mei le rumperà». E Sebastiano disse: «Higi [] averave avegnù lo mal per çoe». Unde Sebastiano he Policarpo speçà plu de dusento statoe de demonij, le qual era en casa de Gromatio. He no abiando elo reçevua sanitae, ancura Sabastiano ge disse: «Çerta cosa hè che tu no à' au ancora ben abandonaa le idole cum lo core, au che tu n'ài altre le qual tu non ài mostrae». E ello respose: «Eo ae una chamera en la qual hè tuta la dispusicione de le stele, en la qual mio pare spendé plu de dusente pisi d'auro. E quieloga eo vego tuto quello chi dé avignire». E Sebastiano ge disse: «Enfina che tu averai questa ovra sana, tu no serai sano». Consentando elo che la destruese, Tiburcio valente he savio, el qual era so fiiolo, no 'l volse se no a cotal pacto: «Eo farò scaldare bene dui forni he se voi no renderì a mio pare cunplia sanitae da che seia destructe queste cose, eu ve farae metere en gi forni». E quisti: «Ne piase bene». Destruando higi questa ovra meraviglosa, lo ançelo aparse a Gromacio he dissige che Iesu Cristo ge rendea sanitae entrega. Unde, fato sano, el corea dreo a l'ançelo he voleage basar gi pei. E l'ançelo no lasà, digando: «Tu no èi ancora baptiçao». Unde Gromacio he Tiburcio cum ben mille quatrocento de la fameia sua recevé lo batesmo. Çoe fu presa da gi enfieli he poi molte pene andè a Dio. E Tarquilino aldio çoe disse: [***] cristiani. E Diocleciano disse: «Nu è questo Sebastiano, el qual eo fi l'altreri sitare?». E Sebastiano disse: «Lo mio signore m'à voiù resusitare açò ch'io ve reprenda de le eniuste pene le qual vu' fai a gi cristiani». En quella fia' l'enperaor el fé tanto bater enfina ch'el morie. E açò ch'i cristiani no adorase el corpo soe per martire, elo fé butare en una longagna, mae lo corpo no tochà alcuna enmondisia. Ello aparse a una sancta dona ch'avea nome Luçila he dissige: «Vae en cotal lugo he sepeliselo a pei di i apostoli».

23, VincenzoVinçencio fu nobel homo de sangue ma plu nobel de fe' he de bontae, he fu çagano de Valerio papa. E perçò che 'l papa era veio he avea una enbrigà lengua, el g'avea cometua tuta la auctorità del preicare, he ello se dava a oracione he a contenplacione. Quisti per comandamento de Daciano fo menai a la çitae de Valença he fu metui en una presone molto obscura. He creçando Daciano prefeto ch'i fosse çae quasi morti da fame, fesige menare inançe he, veçandogi sani he begi, turbao ge disse: «Que dì' tu, Valerio, el qual simulando religiune fà' contra hi comandamenti de gi enperaure?». Respondando elo tepidamentre sì cum veio, Vinçenço gi disse: «Pare santo, no dire cusì flevolmentre ma cum gran francheça ge responde. E se tu lo comandi, eo de parole asaierò el çuese». Elo respose: «Gran tenpo hè, fiiolo mio, ch'io t'oe cometua la predicacion de la parola de Cristo. Unde moe eu te cometo le responsione per la fe' per la qual nu' semo prisi». En quela fia' Viçenço se volse a Daciano digando: «Enfina moe tu à' voiù retrarne da la fe', mo sapie che gran desenore se reputa gi cristiani renegare la fe' soa». Daciano turbao fé menare lo papa in exilio; he Vicenço, sì como çovene he quasi superbo, açò ch'i altri cristiani avese paura, félo levar sul tormento d'unsino. He desolvandose quasi tute le menbre del corpo soe, Daciano ge disse: «Di'me, Viçenço, en que condicion hè lo corpo toe». E Viçenço rigando ge disse: «E' ò moe quelo ch'i' ò senpre desiderao he demandao». Unde Daciano irao cumençà menaçare de farge tormenti d'ogne generacione s'el no ge consentese. E Viçenço: «O bià mie, quanto tu me farà' peço, en quela fia' tu averà' de mie maiore misericordia. Unde, misero, metite contra mie he forçate con tuto el maligno spirito toe, he sapij che per la vertù de Dio eo poroe più portar pene he tormenti che tu no porai enponerme». En questa responsione Daciano, quasi fora de sie, cumençà criare he ferir gi ministri che tormentava Viçenço. E disse Vicenço: «O Daciano, que dì' tu? Ecuti, ti meesimo me vendighi di toi carnifici». En quella fia' Daciano, fato quasi mato, disse a gi ministri: «Miseri, que fai vu'? Perqué se stancha le man vostre? Vu' avie vento gi alçigaori di pare he de le mare he gi avoltri, he no porì vençere Vinçenço?». En quela fia' gi ministri tole pectene de fero he enfichavagi de chia ende le coste, sì che da ogna parte del corpo el sangue ensia he pareage gi enteriore del corpo. Unde Daciano ge disse: «Viçenço, abij misericordia de tie, açò che tu posi recovrare la toa çuventue he no avere i altri tormenti ch'io pensai». E Viçenço respose: «O lengua veninosa del diavolo, eo no temo gi toi tormenti mo temo ch'el pare che tu me vogi fare misericordia. Quanto eo te vego turbao plu contra mi, tanto eo son plu alegri. Eo no voio che tu lassi de farme algun tormento, açò che tu te clami vento da mie». En questo, Daciano el fé deponere del tormento he menare al fugu. He fiando menao, el reprendea gi ministri che igi andava tropo per asio. Vegnù elo, el per propia voluntà muntà su la gra' del fero la qual g'era aprestaa. E montae sue, hi lo volçea mo' ha una parte mo' en un'altra he enficavage gi forcai en lo corpo, unde lo sangue entiriore g'andava fora del corpo. E açò ch'elo avesse maior pena, hi butava lo sale su per lo fogo, mo Viçenço stava quasi enmobele he tegnia i ogli a çielo pregando Dio. He andai gi ministri a Daciano he ditoge questo fato, el disse: «Oimè, nu' siemo vinti! Unde andae he metìlo en una scura presone, he congrega' asae pree calde he metìlo sue abiando ligà gi pei in un gran ligno, he cusie lo lasae stare». Fato ço, lo re de gloria arluminà la presone, le pree se desparse en çà he en lae, gi pei se ge desligae, he vene i ançeli he cum lui stava. Andando Vicenço cum gi ançeli cantando per la presone, he vegnù gi custoe he aldio quel chi era avignue, convertìsse a la fe' de Cristo. Daciano aldio ço disse: «Que ge pusamo plu fare? Nu' semo vinti. Unde andae he fae un bel leto he metìlo sue açò che noi no 'l façamo plu glorioso s'el morise en gi tormenti». Purtae Viçenço a leto he posao una piçula hura, el rendé lo spirito a Dio. He Daciano aldio ço fo molto turbà he disse: «An' no l'ò eio posù vençer vivo, almen el vinçerò morto. Unde andae he portà el corpo soe a un canpo açò che osele he bestie el mandughe». Fato çoe, el vene un corvo he tute le ausele he le bestie etiamdio maior de sie cum le ale he cum lo clamor soe descaçava dal corpo. Narao çoe a Daciano, el disse: «Eo penso che an' morto nu' no 'l poremo vençere. Anda' e liga'ge una gran mola al colo he buta'lo en mare». Fato çoe, el corpo vene plu tosto a la riva che no fé quigi de la nave. E una dona, cum molte altre persone a chi el martire revelà el corpo soe, sì 'l tule he cum gran reverençia lo sepelie.

24, IgnazioEnacio fu disipulo de Çuane Evangelista he veschovo d'Antiocia. Questu' mandà una litera a Maria Vergene, e fu cotale: «A Maria cristifera, çoè a dire ha Maria che portà Cristo, el so Ignacio. Mi novelamentre convertio e disipul del to Çoane tu devivi confortare he consolare; e' ae aldie cose meraveiose del to Iesu, he stupefato son de le cose ch'io aldie. Unde, da tie la qual fosi senpre cum lui cunçunta familiarmentre he sai tute le soe secrete cose, eo desiro cum tuto core eser çerto de quel ch'io ae aldio. Abij senpre bene, he quigi chi è convertie he abita cum mie, senpre da ti, per tie he en tie habia conforto». E la vergene ge respose en questo mou: «Al dilecto condisipulo Ignacio, Maria humel ançilla de Iesu Cristo. Quelle cose che tu asi aldie he 'nprendù da Çuane de Iesu, ele hè veritae. Unde cre' quele cose, apoçate a ele he tene fermo el vohu de la cristianitae, he conferma gi costumi he la vita a lo vohu. Eo vignirò cum Çuane a visitar tie he quigi ch'è con tie. Sta' he prousamentre adovrate en la fe', né no te mova alguna greveça de prosuncione ma confortese el to spirito en Dio to salvaur». Ignacio aldì su un monte cantare gi ançeli antifane bele, unde elo ordenà po' che en la glesia sua ele se dovese cantare sovra gi salmi. Abiando Ignacio molto tenpo pregà Dio ch'el desse pase a gi fieli cristiani, un die, vignando Troiano enperaore da la bataia he vençaure, Ignacio ge fo encontra he liberamentre confessà ch'elo era cristiano. Unde Troiano el fé ligare he menàlo a Roma manaçandoge che lo darave en gi pei de le bestie salvaeghe. Fiando elo menà a Roma, el scrise a gi fieli de Roma ch'i no enbrigasse la pasione soa. Vegnù a Roma, el fo menà enançi Traiano, e Traiano ge disse: «O Ignacio, perqué fà' tu che Antiocia me contrarie he converti gi cavaler mei a Cristo?». E Ignacio respose: «Volese Dio ch'io poese convertire an' tie, açò che tu avise segnoria stabel che mai no manchase». Troiano: «Sacrificha a gi dei nostri he tu serà' prevee sovra gi nostri prevei». E Ignacio: «No voio sacrificare a gi toi dei né desiro l'onore toe, che en algun mohu tu no me porasi muare». E Traiano turbao disse a gi carnifici soi: «Ferìlo cum dure maçe he cum ancini ge squarçae le coste, he poi fregae le plage soe cum olio». Fato tute queste cose contra Ignacio, el stava enmobel sì como el no sentisse queste pene. Unde Traiano disse: «Portae carboni asae he faelo andare a pei nui per sovra». E Ignacio respose: «Nu' cristiani no semo encantaori né malefichi, ançe comandemo en la nostra leççe ch'i dobia fir morti. Ma voi che adora' le ydole sì sie malefiçi». E Traiano disse: «Squarçae lo corpo soe cum ançini he frega'ie le plage cum sale». E Ignacio respose: «Le tribulacion de sta vita no hè condigne a la gloria che nu' aspetemo». E Traiano disse: «Toélo moe he liga'lo cum bone caene e metìlo en cepo en lo fundo de la presone he guarda'lo bene sença bevere he çença mançare, he poi tri die darìlo en mane de lovi a devorare». Vegnù el terço die, l'enperaure he tuto el consigio de Roma he lo povol vene a vere cumbatere el veschovo cum gi lioni. E çunto Ignacio, Traiano disse: «Enperçò che Ignacio hè superbo he inobediente, metélo en la cava di lioni açò ch'i no lassase de lui alcuna reliqua». En quella fia' disse Ignacio al povol chi era iveloga: «Segnor de Roma che veì questa mia passione, sapia' ch'io no sostegno queste pene per algun maleficio ch'io abia cometuo, ma per la santitae he pietae de la fe' de Cristo. Eo son formento de Cristo, unde eo firao masenao en la bocha di lioni açò ch'io sia pan mondo». Aldando queste parole l'enperaur, el ge disse: «Granda hè la paciençia di gi cristiani. Hu' hè algun grego el quale portase cotanti tormenti per lo dio soe?». E Ignacio respose: «Eo no ae sostegnù queste pene per mia virtù ma per la virtù de Cristo». Poi ste parole, Ignacio començà provocar gi lione chi vignisce a elu per devorarlo. Unde dui lioni grande he rei vene cum grande furore a elo he sofegàlo, ma no ge fé alguna altra ençuria al corpo sancto. Traiano, veçù ço, se 'n dè meravigia grande he partìse digando: «Se algun vorà tore lo corpo soe no ge fia veao». Unde gi cristiani vene he tule el corpo soe he cum grande honor lo sepelie. Recevù Troiano letere da Plinio segondo, en le qual elo laudava molto gi cristiani gi qual l'enperaur faea alçire, el fo gramo de ço ch'elo avea fato a Ignacio. Unde el comandà che negun cristiano fiese çerchà per fir mortu, mo chi ge vignise per voluntae fiese punio. El se leçe de Ignacio che en gi tormenti soi el no çesava de mentoare el nome de Iesu Cristo. E demandà da gi tortoraore perqué el mentoava tanto questo nome, []: «[], unde no poso çesare de mentoarlo». E enperçò quigi che l'avea marturià, voiando provare queste cose, ge trase lo core he avrìlo he trovà che de litere d'auro era scripto dentro: «Jesu Cristo». Unde multi veçando questo miraculo se convertie. Questo, quando el fiea menà a Roma, demandà che gi fideli chi era iveloga no anbrigase lo martiro soe, [] en qual era queste parole: «Eo de Siria fio menao en Roma ligao da liopardi, çoe da chavaler gi quali de gi beneficij mei deventà peçuri; e eo de le menacie soe fui plu salvo. El me fi prometù ch'io firò metù a conbater cum bestie. O utele bestie, le qual me sie aprestae! Quando vignirà 'le, quando firà 'le, lassaeme contra! Quando porà 'le mançare de le me' carne? Vegna adoso, he che ele no me perdone, sì como 'le ae ça fato ha algun altro. Perdoname †serv...† Cristo. Eo cognosco que m'è utilitae fogi, cruse, bestie, disiracione de le osse del corpo; he tuti gi tormenti gi quali pò trovar l'arte del diavolo me sia fato açò che eo sea digno de guadagnare Iesu».

25, BiagioGi cristiani de la çità de Sabaste fé Blasio, el qual era humel he devoto he sancto, so veschovo. Per la persecucione che fé Diociano a gi cristiani, elo andè a stare en una speluncha he iveloga menava vita heremeticha; he le ausele vegnia he portavage da magnare, he le bestie salvaeghe se congregava da elu he no se partia enfina ch'el no ge dava la benedicion sua. Se alguna bene amalava, ela vignia da Blasio e, tocandola elo, ela recevea sanitae. Un dì el profeto de quela regione mandà gi soi cavalere a caçare. He seando stanchi de chaçare he no posando prendere alguna bestia, hi vene a la ventura â logo hu' abitava Blasio, he chialoga, trovando bestie asa' che stava enançi Blasio, hi no poté prender alguna. Unde atoniti vene a lo signore he naràge çoe. He lo prefeto mandà di chavaler lae, gi quali menase Blasio he tuti gi cristiani enanço sie. En questa nocte Cristo aparse tre fiae en visione a Blasio digandoge: «Leva sue he offeriseme sacrificio». E la doman per tenpo vene gi chavaler a Blasio. Respose: «Vu' sia' benvegnui. Mo' veç'e' che 'l me signore no m'à desmentegao». Andando Blasio cum higi, no çesava de preicargi e multi miraculi fé enançi lur. En quela fia' una femena povra avea perdù un porçelo; pregàlo che ge 'l fesse recovrare. E elo rigando ge disse: «No te tribolare, femena, ch'el te firà ben rendù lo porcho to». Unde amantignente vene lo love he portàge lo porcho ch'el g'avea tolesto. Vegnù Blasio en çità, el fo metù en presone de comandamento del signore. En l'altro die el se 'l fé vignire enançi he cum bele parole el saluà digando: «Alegrate Blasio, amigo di dominidei». E Blasio respose: «He tu abij alegreça, bon prefeto. Ma no dir dei quigi ch'è demonij, che dé avere lo fogo eternale cum tuti quigi che gi adora». El prefeto irao el fé batere he poi metere en la presone. He Blasio ge disse: «Çença senno, pensi tu per le toe pene poer torme l'amor de Iesu, el qual è mio alturiaur?». Aldio la vedoa a chi elo avea rendù el porcho [] e portàge lo cavo e gi pei cumesso una candela [] «a la glesia mia. E sapij che a tuti quigi che farà ço, bene ge 'n pertignerà». Unde, enfina ch'ela vivé così fé, he ave ben he bona ventura. Poi ço, lo prefeto el fé menare enanço sie he, no posandolo endure a sacrificare a le idole, el lo fé levare en un legno he cum petene de fero fége squarçare le carne he poi ço menarlo a la presone. E sete femene cristiane andava poi elo cuiando en begi lençoli le goçe del sangue che ensia del corpo soe. Unde, veçù çoe, ele fo presse he fiea constrete de sacrificare a gi dei soi. Ele disse al prefeto: «Se tu vòi che nu' façame reverençia a gi toi dei, mandagi al lago açò che, lavaege le façe, nu' plu honestamentre gi pusamo honorare». E llo prefeto, alegro fato, alo' gi mandà al lagu. Vegnue ele, he 'le prese le idole he butàle en l'aqua digando: «Mo' veereme nu' se igi hè dei!». Unde lo prefeto aldio questo començà insanire, he di pugni firandose disse a gi ministri: «Perqué no tegnisi vu' gi dei nostri sì che ele no i avese butai en l'aqua?». E igi respose: «Queste femenete parlà soto coverta açò che 'le anegasse gi dei nostri». E le femene disse al prefeto: «Lo Dio verasio no pò fir enganao. Unde se questi fosse dei, igi averave sapiù ço che nu' voliemo fare». E lo prefeto irao fé meter da una parte plunbo colao buiente he petene de fero he sete pançere abrasae, he da un'altra parte sete chamise blanche, he dissige: «Toì qual parte vu' volì de queste doe». E una de queste, la qual avea dui fiioli, corse he tole le camise he butàle en lo fogo, e gi fanti disea a la mare: «Mare dolçisima, no ne lasare drio da tie, ma sì como tu n'à dao la dolceça del to lacte, così fa' che nu' abiamo de vita eterna». E lo prefeto comandà ch'ele fiese apichae en alto he cum petene de fero squarçae le carne soe, e de le carne ensia lacte en logo de sangue. Sustignando ele gi tormenti prohusamentre, l'ançelo de Dio vene da ele per confortarle he dissige: «No ve temì, quelo hè bon lavoraore el qual comença ben he ben finisse. Cotal operario aspeta el pagamento bon dal so signore he reçeve benedicione he pagamento bono». Lo prefeto, veçando la paciencia soa, le fé meter en una fornase ardente, ma lo fugo per la vertù de Dio s'amorçà, e 'le ensì fora çença algun male. E lo prefeto ge disse: «Lasa' ancomai la vostra arte magicha he adora' gi dei». E le done respose: «Cunpli quelo che tu ài començà, che nu' semo ça clamà a vita eterna». E elo dè contra ele sentença ch'ele fosse degolae. Unde, vegnù al logo, elle meté gi çinocli en terra he disse: «Dio, el qual n'asi partì da le tenebre he fato vignire a la luse del cognosemento toe he à'ne fate to sacrificio, reçive le anime nostre he cundu'le al regno toe». E poi sta oracione el ge fo tronchà gi cavi. Poi ço, lo prefeto se fé vignire Blasio denançi he dissige: «Almen omai adora gi nostri dei, se no che mal firai tractao». E Blasio respose: «Malvasio, eo no temo le toe manaçe. Fa' ço che tue pòi, ch'eo te do en tuto el corpo mio». En quela visenda, elo fé butar en un lago, e alo' l'aqua ge stete ferma soto gi pei sì cum terra. Unde el se volse al povol ch'era sovra per la riva he dissige: «Se gi vostri dei hè verasij dominedei, mostraelo moe he vignì a mie sentà per l'aqua». E XVIIJ de quisti enfiele entrò en l'aqua per voler andar da elo he amantignente higi s'anegà. E poi ço, l'ançel vene he dissige: «Ven fora Blasio del lagu he recivi la corona che t'è aprestaa». E vegnù fora, el prefeto de Roma: «Ae tu afermà a postuto de no adorare gi dei nostri?». E Blasio respose: «Sapij miser che eo son cristiano he servo de Cristo he no adoro gi toi dei». En quela fia' el profeto dè sentença ch'el fiesse decapitao. Vegnù al logo, el fé oracion a Dio che çaschauno el qual de la enfirmità de la gula au de alguna altra clamase el so altorio, che el fiese exaldio. E una vose da çielo vene ha elo he disse che cusì chomo avea demandao cusì serave. E poi çoe ello cum dui fantinegi fo degolao.

26, GiorgioÇorço fo nobel homo de Capadocia. Questui andando una fia' pervene a la provincia de Lidia en una çità che fi apelà Silena. Cercha questa çitae era un lago en lo qual abitava un drago, lo quale plusur fiae avea fato dano a quigi de quela çitae, voiandolo alçirlo; e vegnia questo apreso gi muri de la çitae, he cum lo flaur soe multa çente venenava he alçiea. Unde gi çitaini avea ordenao che ogne die fiese menao due pegore açò che 'l dragone le avese aprestae per mançare he non aprosimasse a la çitae. Seando cusì fato un gran tenpo he vegnue le bestie a meno, higi ordenà ch'el ge fiesse dao un homo he una pegura. Andando sto fato per le sorte he no posandose algun escusare, he en questo mohu seandone multi homini he femene morti de la çitae, el vene le sorte sovra la fiiola del re. E lo re voiando scanpare la fiiola disse al povolo: «Toì auro he arçento he la mità del regno mio he no dae mia fiiola a lo dragone!». E lo povol cum furore respose: «Re, tu ài fato questo e quasi tutî nostri fioli hè morti, he tu vòi mo' scanpare tua fiiola? Se tu no servi en toa fiiola quel tu ae servà en le nostre, nu' brusaremo lo palasio toe he ti cum tuta toa fameia». Unde el re, veçando cusì, començà plançere la fiiola he dire: «O dulcisima fiiola, que dirà' ge de tie? E' no vederò le noçe toe le qual eo aspetava cum alegreça». E demandà lo re: «Endusiamo de chi a VIIJ die» dal povolo. E, fata la endusia, vene lo termene, unde lo povol volse pur che lo re desse la fiiola. Veçando el re ch'el no la poea scanpare, el la vestì de le veste regale he cum lagreme abraçandola disse: «O fiiola dulcisima, eo creea vedere de ti fiioli gi quali regnasse en mio logo cum eo no abia algun altro fiolo; ecutie, tu vai a fir mandegaa dal dragone. Eo sperava d'ornare el palasio de toe noçe he aldir enstrumenti he veher solaçi en la corte toa, he tu fi menà a la morte. Volese Dio ch'io fosse morto enançi ch'averte cusì perdua». E basandola, lasàla andare. E la fante se ge butà a gi pei he disse: «Pare mio, da'me la toa benedicione». He recevua la benedicione dal pare, andè a lo lago. Vegnando per la ventura de Dio Çorço per questa contraa, ave veçù questa fante cusì bella he hornaa plançere. Unde el domandà que 'la avea, e la fante disse: «Bon çoven'omo, monta viaço a cavalo açò che tu no mori an' tu cum mie». E Çorço ge disse: «Fiola, no aver paura, ma di'me que tu fai en questo logo, siando tuto 'l povolo da luitano he guardantote». E questa: «O çoveno, sì como e' ò veçù tu èi de grande core. Ma perché vòi tu morire cummessu mi? Fuçi viaçamentre!». E Çorço ge disse: «Eo de chialoga no me partirò se tu no me dì' ço che tu ae». Ditoge tuto 'l fato, el disse: «Fiiola, no avere paura, che eo en lo nome de Cristo sì te altoriarò». E la fante respose: «Bon chavaler, no volere perire per mie! El basta ben ch'io mora sula. Tu porisi ben morire cum mie, ma no pòi altoriarme». Parlando la fante queste cose, el drago lançà el cavo del lago e lla fante enspauria disse: «Bon cavaler, fuçi tosto, fuçi!». E Çorço, veçù el dragone, muntà viaço sul cavalo e çé encontra al dragone el qual vegnia a elo. E fato el signo de la crose en la fronte he comandause a Dio, el enclinà la lança he andà a ferir lo dragon. E fatoge una gran plaga e butàlo en terra, el disse a la fante: «Fiiola, buta al colo del dragone la coreça tua he no avere alguna paura». E fato la donçela çoe, el dragone g'andava dreo sì como s'el fosse una bestia desmestegà. Vignando el dragone a la citae, el povol començà fuçire al monte digando: «Guai nui, che nu' seremo ça tuti morti!». En quella fia' Giorçu ge fé ensigna che igi no fugisse, cognosendo che Dio l'ave mandà en queste parte açò «ch'el ne scanpi da le pene de questo dragone». «Unde creì en Cristo he batiçàve, he eo alçirae questo dragone». Batiçao lo re he tuto 'l povol, Çorço cum la sua spaa alcise el dragone e, menao da quatro para de boi en un canpo, fu brusao. Unde ben XX milia, çença gi fanti he le femene, en quel dì se bateçè. E lo re, en honor de la vergene Maria he san Çorço, hedificà una gran glesia, e de questo altare ensì una fontana de la qual tuti gi enfirmi che ne bevea recevea sanitae. Lo re poi ço congregà grande avere he volea darlo a Çorço, ma elu no volse alguna cosa he félo dare a gi poveri. E Çorço dè al re quatro amaistramenti. Un, che l'avesse cura de le glesie de Dio; el segondo, che ello honorasse gi prevee de Dio; el terço, che l'aldisse l'officio de Dio cum bona reverençia; e lo quarto, ch'el se recordasse di poveri. E dao pase al re, partìse de questa contraa. En questo tenpo, enperando Daciano, el fo tanta persecucione de gi cristiani che enfra un messe deseocto milia ne fo morti. Unde, veçando Çorço che multi di cristiani renegava per gi tormenti grandi che ge fiea fati, el meté çù l'abito de la cavalaria e vestìsse sì como cristiano. He dao tuto el so per ge poveri, vene al çuese he disse: «Tuti gi dei de gi pagani sì è demonij, ma Cristo sì à fato el çielo». E lo çuese ge disse: «Per que prosencion hèi tu ardio d'apelare gi nostri dei demonij? Di'me unde èi tu, que ae tu nome». E Çorço disse: «Eo ae nome Çurço e son de nobel sangue de Capadocia. Cum l'alturio de Cristo eo vençì Palestina. Ma per ço ch'io poesse meio servire a Dio, eo sì ò abandonà tuto quel ch'io avea». Voiando lu çuese convertirlo a sie he no possando, el lo fé meter al tormento he squarçarge le carne, e fége metere fasele ardente de fugo he fregare le plaghe de sale. En questa nocte Iesu g'aparse cum gran luse e dulçementre lo confortà, unde tanta fo la dolçeça del conforto de Cristo che l'ave po' tute le pene per niente. Veçando Daciano ch'el no poea vençere, clamà a ssie un magu he dissige: «Gi cristiani cum le arte soe no temo tormenti né pene he despresie gi sacrificij de gi dei nostri». E lo mago respose: «Se eo no venço le arte soe, he' voio perder lo cavo». Vegnù questo a Çorço, encantàlo cum arte de demonij. E Çorço, fato el signo de la crose a sie he sconçurà lo veneno, tuto el bevé he no ave algun male. Lo mago ancora plu forte veneno ge dè. E Çorço, bevuolo, no ave algun male. Veçando ço lo mago, el se butà a gi pei de Çorço e pregava ch'el lo bateçasse, unde Daciano el fé alo' degolare. En l'altro die el fé metere su una roa; 'la era plena da ogna parte de spae aguse. Ma per vertù de Cristo la roa alo' fo rota he Çorço no ave algun male. Irao, Daciano el fé

27, CristoforoCristoforo fo de Chananea, grande del corpo, he avea una faça teribile, he en longheça avea XIJ cubiti. Stagando el cum un re de quele contrae, el ge vene en core de trovare el maiore re del mundo he stare cum elo. Unde el vene a un re el qual fiea dito esser el maiore re che fusse nel mundo. E lo re, veçù Cristoforo, voluntera lo reçevé en sua corte. Una fia' çunse un çugolaro a questa corte he començà cantare una cançone en la qual multe fia' el diavol fiea mentoà. E lo re, cum el fose cristiano, senpre se signava cum el çularo mentoava el diavolo. Unde Cristoforo veçando çoe multo se maraviglava no sapiando que signo fosse la crose, he domandò el re perqué el se faea cotante visende quel signo. Lo re ge disse ch'el no curase de ço. «Se tu no me 'l dì', eo no starò plu cum tie». Unde lo re ge disse: «Ogna fia' ch'io aldo amentoare el diavolo, eo me signo ch'el no me posa nosere». He Cristoforo: «Se tu ae paura che 'l diavolo no te nosa he perçò te signi, tuncha lo diavol hè maiore segnore de tie. Unde eo sun enganao creçando che tu fusi lo maior signor del mondo, e enperçò eo t'abandono, ch'e' voio trovare lo diavolo». Andando Cristoforo per una gran solitudene, el vete una gran compagnia de chavalere, he un de quisti, el qual avea una faça multe teribile, vene a Cristoforo he dissige: «Hu' và' tu he que çirchi tu?». He Cristoforo: «Eo vo çerchando el diavolo per star cum elo». E questo disse: «Eo sun quel che tu çirchi». Unde Cristoforo, alegro, metése andar cum ello. Andando entranbi per una via ha una crose la qual era en la via, e lo diavolo veçua la crose ave paura grande he, lassà questa via plana, menà Cristoforo per una via aspera he ria. Unde Cristoforo amirando disse al diavolo: «Perqué ài tu lasà la bona via he àime menà per la ria?». E no voiando el diavolo manifestargelo, Cristoforo disse: «Se tu no me 'l dì', eo me partirò alo' da tie». E lo diavolo, no voiando perderlo, sì ge disse: «Un homo el qual fi dito Cristo sì fo metù su la crose he morto. Unde, quando eo veço sto signo, eo me temo he fuço». «Tuncha Cristo è maior signore he plu posente de tie. Tuncha eo sun faigao envano he no hoe ancora trovao el maior signor del mundo. Unde abij bene, ch'io te lasso he voio çercare Cristo». He andando un gran tempo çercando chi gi ensegnase Cristo, el vene a un remitho el qual ge manifestà la fe' de Cristo he batiçàlo. He poi ço disse el remito a Cristoforo: «Questui vole che tu debij çunare». E Cristoforo: «Altre cose me comandi ch'io faça, ché questo no posso fare». E lo remitho: «Almen oracion farai». E Cristoforo: «Eo no soe orare he no 'l posso fare, mae altro servisio domandame». E lo remitho ge disse: «Sae tu cotal aqua en la qual more cotanta çente pasandola?». E Cristoforo: «Ben so en qual logo 'la hè». E lo remito: «Cum tu sì è' grande, lungo he forto, va' lae he quelor che vorà passare, portarègi ultra. En questo servixio eo creço che tu servirà' a Cristo, che elo alguna fia' te se manefestarà». Unde Cristoforo: «Questa ovra ben voio fare per servire a Cristo». Vene a questo flume e fésse una casa apreso, he tuti quigi che pasare volea el ge pasava su le spale soe, abiando una gran pertega su la qual el s'apoçava passando el flume. Fato el sto hofficio un gran tenpo, stagando el en casa soa el aldì la vose d'un fante clamarse he dire: «Vèi fora Cristoforo he portame ultra l'aqua!». El fo alo' ensuo fora he no ave trovao alguno. Tornao en casa, pocho stete che l'aldie ancora quela vose, unde el alo' ensì fora he no trovà algun. Tornà en casa, elo la terça vose aldì digando: «Cristoforo, veni fora he passame!». Ensio fora, el vete un fante stare sovra la riva del flume el qual el començà pregare multo dolçementre ch'el lo passase. Unde Cristoforo tole lo fante su la spala he entrà en lo flume. E alo' el flume començà de cresser a pocho a pocho he lo fante pesarge sì cum plunbo. Quando Cristoforo andava plu entro 'del flume, he l'aqua cresea he lo fante più pesava, unde gran paura ave Cristoforo de perigolare en l'aqua. Mae, vegnù a pena a la riva, he meté çó lo fante he dissige: «Fante, en gran perigulo m'ài metuo he à'me pesao sì como s'io avese tuto 'l mondo adoso». E 'l fante respose: «No te dare maravia, Cristoforo, che no pur el mondo tu ài abiù adosso mae quel el qual ae creà el mondo. Eo son Cristo to re a chi tu servi en sta ovra de passar ultra st'aqua. E açò che tu sapij ch'e' digo vero, quando tu serai tornao d'oltra enfica lo to bastone apreso la casa toa he domane tu trovarai ch'el serà verde he averà fructo». Vegnù Cristoforo a l'altra riva, el plantà lo baston soe apreso la casa he la doman trovà ch'elo era verde he avea gi beli datari sue. Partiose de chialoga, helo andè a una cità de Liçia la qual fi dita Samor. E no entendando el lo lenguaço soe, el pregà Dio che ge desse [] poer entendere he favelare en questa lengua. Stagando el en oracione sovra çoe, quegi ch'andava çercando gi cristiani crete ch'el fosse un mato. Reçevua el la gracia del parlare, el se covrì la faça e vene â lugo en lo qual gi cristiani fiea marturià, e confortavagi ch'i stese costanti. En quela fia' un di çuese ferì Cristoforo en la faça, e Cristoforo ge disse: «S'e' no fosse cristiano, heo vendegarave ben l'ençuria mia. Unde a conversion del povol, eo conforto gi cristiani». El ficà lo baston soe en terra he pregà Dio ch'el deventasse verde he fesse rami he foia. He fato cusì, octomilia persone se convertie he bapteçàse. Lo re, aldio çoe, mandà dusente chavalere ch'el menase enançi de lui. Vegnù higi, hi lo trovà orando he no gi osà dire alguna cosa de quel ch'avea comandà el re. He no tornando endrio higi, lo re ge 'n mandà artanti. E vegnù a elo he truvàlo horando, higi se meté en oracion, e 'l ge disse: «Que demandae vu'?». He igi guardandolo per lo vuolto respose: «Lo re n'à mandai açò che nu' te menemo ligao ha elo». Cristoforo respose: «Se eo no vorò, né ligao né desligao vu' no me ge porì menare». E gi cavaler disse: «Se tu no vòi vignirge, va' liber hu' te plase he nu' diremo che nu' no t'avemo trovao». E Cristoforo: «Non voio, ma vigniroe cum voi». Unde Cristoforo se lagà ligare he andè cum higi al re. E andando, el convertì quisti cavaleri a la fe' de Cristo. E vegnù enançi, lo re ave gran paura veçandolo così grande he teribele, unde el caçì çó de la seça soa da paura. E, levao su da gi servi soi, el disse a Cristoforo: «Unde èi tu, he que ài tu nome? No mentire!». E Cristoforo: «Enançi el batesemo avea nome Reprobu, ma mo' [] me fi dito Cristiano». E lo re: «Mato nomo t'ài enponuo, d'un homo crucifisso, el qual no poté alturiare sie he no porà aiare nean' tie. Unde, chanineo malefico, perqué no sacrifichi tu ha gi nostri dei?». E Cristoforo al re disse: «Ben fo to nome Dagmio, che tu hèi morto del mondo he cunpagno del diavolo». E lo re ge disse: «Tu èi norio entro le bestie he enperçò no pòi se no bestialmentre favelare. Sapij che se tu sacrificase a gi nostri dei tu averisi da nu' grande honore, he se no tu averà' multi tormenti». No voiando Cristoforo sacrifichare, el lo fé meter en preson, e gi cavalere ch'avea creto en Cristo fé degulare. Poi ço fé meter doe femene cumesso Cristoforo açò che elle lo traese a pecao. He una de queste avea nome Niçea he l'altra Aquilina, ch'era

28, EustachioEustachio, el qual fiea enançi dito Plaçido, fo maistro de cavaleri en lo tenpo de Traiano enperaure. Questu' era molto grande elemosenere he piatoso homo ma he pagano, he avea una moier pagana ma plena de conpasione a gi poveri. Quisti ave dui fiioli, i quali igi fé norigare segondo la grandeça soa granmentre. Inperçò ch'igi era piatosi, Dio ge mostrò la via de verità. Unde, andao un die Eustachio a chaçare, el trovà un gran greço de çervi; entro quisti n'era un maiore he più belo. E partio questo çervo da i altri, Plaçido, lasà i altri chavaleri, començà seguer questo. Andando una grande ora cusì chaçando, el vene su una altura. E Plaçido en cor soe pensava cum elo el puese piare. E guardando el multo diligentrementre sto çervo, el vete una crose resplendente dentro da le corne soe, he en la cruse era la figura de Cristo. E Iesu Cristo per la boca del çervo ge disse: «O Placido qué me ve' tu drio? Eo per toa utilità t'ò voiù aparere en questa bestia. Eo sun Cristo el qual, no sapiando, m'onori. Cum le toe lemosene hè' vegnù enançu mie, unde eu son vegnù per chaçar tie, lo qual vòi prendere sto çervo». Plaçido, aldì queste cose, se butà da cavalo per gran paura he, stà quasi strangolao, poi una bona ora se levà he disse: «Manifestame, misser, chi tu èi he eo poi crederò en tie». E Cristo disse: «Plaçido, eo sun Cristo, lo qual hà' creà lo çelo he la terra, partì la luse da le tenebre he à' fato lo tenpo, lo dì e 'l mese he l'anno; el qual formà' l'omo de limo de la terra. Vegni en terra a reçevere carne he sostegnì la crose per salvacion di homini he resusità' el terço die». E Plaçido, aldando ço, caçì en terra he disse: «Messer, eu creço che tu èi factor de tute le creature he çirchi la conversione de tuti gi pecaure». E Cristo: «Se tu crei, va' al veschovo de la toa çità he fa'te batiçare». E Plaçido: «Vòi tu, meser, ch'io diga queste cose baldamentre?». «A toa moiere he a toi fiioli, açò se bateçe ensenbre cum tie. He domane vignirae a questo miesemo lugo, ch'io t'aparerae ancora he diròte quel chi te dé avignire». Vegnù a casa he digando a la moiere queste visione, ela clamà he disse: «Marì mio, he eu en l'altra nocte, marì mio, el vite, he disseme: 'To mario, to fiioli he ti vignira' da mie'. Unde eu hae cognosù che l'è verasio Dio». E levai higi sue da meça nocte, ige andè al veschovo de Roma e lo papa gi reçevé cum grande alegreça; ha Plaçido meté nome Heustachio he a la moier meté nome Thespite he a gi fiioli Agapitu he Theospitu. Fato die, Eustachio andè a chaçare cum gi cavalere soi. Vegnù â logo primere, vete el çervo sì como denanço, unde Eustachio disse: «Misser, eu te prego che tu me dige quel che tu m'à' prometuo». E Cristo: «Beao èi, Eustachio, ché tu ài reçevù la mia gracia. Mo' ài tu ventu lo diavolo che t'avea enganao, mo' aparerà la toa fe'. El diavolo, enperçò che tu l'ài abandonao, hè multo comovesto he armà contra tie. Unde sapij ch'el te fa mister sostegnire multe tribulacione açò che tu abie la corona de vita eterna; el fa mistere che tu desmonte de le alteçe de sto mundo açò che tu deventi richo en le cose de Dio. Unde no te lasare vençer da alguna persecucione né no guardare a la gloria che tu ae abiuda, sapiando ch'el convene che tu sie un altro Iop. Mo quando tu serà' humilià bene, eo turnerò a tie he reduròte a la tua primera gloria he honore. Unde di'me se tu vòi mo' avere queste teptacion he tribulacione, au en fine de la vita toa». Eustachio respose: «Meser, s'el fa chusì mister, da'ne mo' queste tribulacione, mo doname vertù de paciencia açò che nu' no siamo venti». E Cristo disse: «Sì fermi che la mia gracia serà en vue he guarderà le anime vostre». He dite ste cose, Cristo andè en çelo he Eustachio tornà a casa he narà queste cose a la moiere. Poi no gran tenpo, el vene una mortalitae he tolege gi servi he le ançele soe. Drio questo, el vene un'altra enfirmitae he açisse tuti gi cavagi soi he le bestie. Veçando ço, arguanti malvasij homini entrà de nocte en casa soa per força he tule vestimente he auro he ogne cosa che l'avea en casa, he a pena fuçì elo cum la moier he cum gi fiioli. Veçando Eustachio questa miseria en la qual el era caçù, metésse andar in Egipto no voiando esser cognosù da gran vergonçia, e andò el cum la moier he cum gi fiioli; vene al mare, trovà una nave, montà sue. Veçando el signor de la nave la moier de Eustachio esser bela e vegnù ha un porto, el començà requerire lo nolo de Eustachio. He no abiando unde pagare, el ge tole la moiere. E no voiando Eustachio consentir a ço, lo segnor de la nave fé signo a gi marinari che 'l butase en l'aqua s'el per voluntae no se partia. Unde Eustachio, veçando così, doloroso se partie cum entranbi gi fiioli. E andava digando: «Fiioli mei, guai a mie he a vue, che la mare vostra hè daa ha un altro mario». He vegnù a un'aqua, no alsà portare entranbi gi fanti ultra perché 'la era tropo grande. Unde, lasao l'uno su la riva, el portà l'altro. E seando elo en meço l'aqua, el vene un lovo e tule el fante ch'elo avea portao d'oltra he fuçìsene via. Unde Eustachio, desperao ça de questo, andava a tore l'altro; ecuti, vene un lion he portàlo via. Unde, no posando alturiare ne l'un né l'altro, començà plançer he scaviarse, he se Dio no l'avese alturiao serave per grameça anegao. Gi pastore chi era çercha quel flume sì da l'una che da l'altra riva, no sapiando Eustachio, andè drio a loro e tulege el fante. He gi altri andè drio a lione he tolege l'altro. E era sti pastore tuti d'una vila he norigà quisti fanti. Eustachio, perdui gi fanti, andava doloroso digando: «Oimì, che no hè gran tenpo ch'io era frescho he morbio come hè l'arbor fresco, he mo' eo sun nuo he povero he misero! Oimì, ch'io solea andare çircundao da multi chavaler he donçeli, mo' no hò ie pur la moier mia he fiioli mei! Eo me recordo, dolçe Iesu, che tue me disisi ch'el me faiva mister essere tribulao sì cum Iop, ma eo veço ch'i' ò più tribulacion de Iop, ché Iop ave la moier, eo no la oe; Iop ave la casa soa, eo la hoe perdua; Iop ave gi tri amighi soi che 'l vene a consolar, eo no n'oe algun. Unde, misser, mete omai fine a le tribulacion mie he miti guarda a la mea lengua sì ch'io no te ofenda». He digando ste parole, el vene ha una villa en la qual stete X agni per guardian di canpi de sta villa. E gi fiioli soi era en un'altra vila no multo lonçi. Dio per la soa pietà conservà la moier d'agne ençuria, unde morì quel che l'avea toleta e 'la romaxe munda. Enfra questo tenpo, el començà multiplicare gi enimisi di romani he moverge guera. Unde Traiano

29, Nicolò[***] en quella nocte. Sapiuo higi da gi custodi de la presone ch'i devea morire, hi començà squarçarse le vestimente soe he plançer amaramentre. Recordao un de lor, el qual avea nome Nepoçiano, cum Nicholao avea scanpao gi tri chavalere da morte, el cumençà endure i altri conpagni soi ch'i se tornasse a Nicholao. Unde, orando quisti he domandando Nicholao en so alturio, el aparse a Costantino en quella nocte e dissige: «Perqué ài tue preso quisti tri enoçenti prinçipi he metui en presune he contra rasone comandà ch'i sea morti? Leva sue viaçamentre he cumanda ch'i fia lassai. He se tu no 'l fai, eo pregarae Dio ch'el te mova una bataia en la qual tu fij morto he mandegao da bestie». E l'enperaore ge disse: «Chi èi tu el qual de nocte èi vegnù en lo palasio mio he èi ardio de dirme cotal parole?». E quelo: «Eo sun Nicholao vescovo de la çitae de Mirea». Andè altresì al prefeto che l'avea acusà he dissige: «Mato he disentiao! Chomo pois tu consentire en la morte de quisti tri gi quali no ave alcuna culpa? Leva sue tosto he fatigate ch'i sea lasai». He lo prefeto respose: «Chi è' tu chi me manaçi?». El ge disse: «Sapij ch'io son Nicholao vescovo de Mirea». Levai su entranbi he vegnui ensenbre, l'un disse la visione a l'altro. E per voluntà de Dio, abiando temor de sta visione, mandà viaço alla presone he fé vignire quisti tri prinçipi. E vegnui, l'enperaur disse: «Que ree arte savì vu' per le qual vu' n'abiae fato aparere cutal visione?». E higi respose: «Enperaor, noi no savemo arte magicha, né avemo merità d'esser morti». E l'enperaur ge disse: «Cognosì vu' un homo el qual hà nome Nicholao?». Quisti, oldio mentoare Nicholao, levà le man a çielo pregando che Dio ge scanpasse per gi meriti de lo servo soe Nicholao de questo perigolo. Aldio l'enperaur da quisti tuta la vita de Nicholò, hel ge disse: «Anda'vene 'legri he seguri he referìge gracie, che per elo vu' si' scanpai. Toì altresie da mi done he prega'lo ch'el no me manaçe piue, ma preghè Dio per mie he per lo regno mio». Scanpai da morte quisti, no poi molto tenpo hi vene a Nicholao he dissige tuto questo fato he referìge gracie de la soa liberacion digandoge: «Veriasamentre tu èi servo de Cristo he cultivaore de la sancta trinitae». He Nicholao, aldio la gracia che Dio g'avea facta, el levà le mane a çielo he laudà Dio. E maistrà quisti principi, hi tornà a le case soe. Voiando ça Dio clamare a sie Nicholò, el se enfermà. He veçù vignire i ançeli da sie, el disse quel salmo: «In te speravi», de chi a: «in manus tuas, domine, comendo spiritum meum». E en questo rendé lo spirito a Dio, curando tresente quarantatri agni. Seando metù en una archa de marmor, dal cavo soe ensie una fontana d'olio he da gi pei una fontana d'aqua, de le qual fontane molte sanitae reçevea gi enfirmi. Poi el, fo fato veschovo un bon homo, mo en brevo tenpo enviliosi he rei homini hel descaçà del veschovao e alo' el cesà d'insir l'olio. Fo retornao el veschovo en l'onor soe he alo' el començà vignir l'olio de l'archa. Poi un gran tenpo, quigi de Tartaria destruse la çità de Mirea he, averta l'archa de Nicholao, hi trovà che tute le osse soe noava en olio. Unde igi cum gran reverencia tole le osse soe he portàle en la çitae; hè LXXXVIJ agni. Un cristiano avea tolesto a enpresto da un çueo una quantità de pecunia he, no posando fare al çueo altra segurtae, el ge çurà su lo altare de san Nicholao de dargela alo' cum elo ge la domandarave. Poi un bon tempo el çueo ge domandà la pecunia e 'l cristiano respose ch'el ge l'avea rendua. Unde el çueo trase questo a la rasone, e 'nançi el çuese el fo dao el secramento al cristiano. Questu' avea fato un baston cavao dentro he avea metù dentro tanto auro masenao como el dovea rendere al çueo he an' plu. Unde, abiando sto baston en mane ch'el parea portar per enfirmitae, el sì 'l dè al çueo che lo tignise enfina ch'el çurerave, e lo çueo el tene no sapiando de l'ingano. Çurà questo ch'el g'avea rendù etiamdio plu ch'el no ge dovea dare, el tole el bastone dal çueo. E tornando a casa, sopno grande el prese entro una via. He vignando un charo cum grande inpeto, pasàge per adoso he avelo morto he ronpé lo bastone sì che l'auro se spanse. Congregae molte persone al corpo he veçando questo morto he l'auro chi era in la maça, vene an' lo çueo; e digando le persone che cognosé l'engano, ch'el tolese questo auro, he respose: «Eo non farae niente se questo no torna vivo per gi meriti de san Nicholao. He se ço devene, eo me farò batiçare». Alo' poi queste parole, el morto resusità e lo çueo reçevé el batesemo. Un çueo, aldio che san Nicholao avea gran vertue en fare miraculi, sì se fé fare la ymagine soa en una tavola he metéla en la casa soa. E quando el andava en algun logo, disea a la imagine soa: «Ser Nicholao, eo ve cometo tute le cose mie, unde abia'ne bona cura. He se no, eo ve rechererae da vue cum bote he cum flageli». Un die vene gi laroni no seando el çueo en casa. [] ma la ymagene de san Nicholao lasà. Vegnù el çueo he veçando aver perduo tuto quel che l'avea lasà, andè a l'ancona he dissige: «Ser Nicholao, eu v'avea metù en la mia casa perché voi devesane guardare la mia roba. Perché no l'avì vo' guardaa? Certo vu' el conprarie». Unde Tiburcio ferì la imagene duramentre he batéla. Cosa meravigiosa, partando gi laroni la roba, san Nicholao ge parrse digando: «Perqué m'avì vo' fato bater cusì duramentre? Perqué ài e' recevù tante bote per voi? Veì como el corpo mio è tuto negro? Veì cum lo sangue mio da molte parte esse? Unde andae viaço he rendì ogna cosa. E se noe, el pecao vostro serà manifestae he çaschaun de voi firà apicao». He gi laroni ge disse: «Chi è' tu chi die queste parole?». He elo: «Eo son Nicholao servo de Cristo, la chie ymagene quel çueo avea metua en casa soa per guardare la soa roba. E perçò che vu' l'avì tulesta, el l'à batua he feria». Gi laroni, aldio he veçuo questo, andè al çueo he dissige la vision sua e rendége tuta la roba. He lo çueo ge narà tuto ço ch'elo avea fato he dito a la ymagene de san Nicholao. Unde gi laroni lasà l'envolare he fo boni homini he lo çueo vene a la fe' de Cristo.

30, SilvestroSilvestro fo fiiol d'una sancta dona la qual ave nome Iusta he fu amaistrà da un prevee che ave nome Çirino. Era Silvestro homo ch'amava recever gi pelegrini he gi povri, unde recevé una fia' un sancto homo el qual [] avea scivao per paura da la persecucione la qual fiea contra gi cristiani. Morto Timotheo poi un anno per la fe', Tarquilino chi era prefeto de Roma, aldio che Thimotheo avea abiù thesauro grande, prese Silvestro voiando ch'el ge dese sto thesoro, mo, sapiù ch'el no era vero, disse a Silvestro che sacrificasse a le ydole, se no ch'en l'altro die el ge farave tormenti asai. E Silvestro disse: «Mato, en questa nocte tu morerai he reçeverai gi toi ensiti enfernali, e voiando au no voiando tu cognoserai el vero Dio di cristiani». En questo, Silvestro fo menao en presone. E Tarquilino, enviao, andè a un disenare. Mandegando Tarquilino, un osso de pesse se ge traversà en lo glutaore, el qual no posando el glutir né spuar fora, çircha meça nocte el morì. Unde cum planto grando el fo portao a la fossa, he Silvestro cum alegreça tracto de presone. Poi ço, [] Melçiades papa de Roma he tuti gi cristiani fé Silvestro an' contrariase 'l quanto el poea. E fato papa, el se fé dare en scrito tute le vedoe e gi orfani de Roma he a tuti proveea segondo ch'el poea. Questue ordenà che lo mercore he lo vendere e lo sabao fosse çunao da gi cristiani. Selvestro, veçando la persecucion granda contra gi cristiani, ensì de Roma cum arguanti soi clirighi e stava sun un monte che avea nome Sirap. E Costantino enperaur per la persecucione granda ch'el faeva a gi cristiani deventà levrose, de la qual enfirmitae negun meago el poé guarire. Vene gi preve de le idole he dissige ch'el porave guarire s'el se bagnase en sangue caldo de fantini piçuli. Unde fo fato vignire de diverse tere çircha trea milia fantini en Roma. Andando l'enperaur â logo en lo qual el se dovea bagnare, el ave veçù le mare di fanti cum gi cavigli squarçai he duramentre plançer. Unde el domandà que femene era queste he perqué ele plançea. E sapiuo, el disse: «Aldie, conpagni mei he chavalere he tuto 'l povol che m'è da presu. La dignatà del povol de Roma nase he vene de fontana de pietae, und'è comandaha en le soe leçe che çaschaun el qual etiamdio alçiese algun piçol fante en bataia devese perdere lo cavo. Quanta crudeltà tuncha serave fare a gi fiiol de la nostra çente quel che no se dé fare a gi stranij? Que tuncha utilitae serave vinçere gi barbari se nu' se lasemo vençer da la crueltae he la enpietae? Vençer gi stranij povoli avene per força de quigi che conbate, ma vençer gi vicij e gi pecai sì vene da la vertù de l'anima. En la bataia cum gi enimisi nu' semo, quando nu' ge vencemo, più pro' de higi. Ma quando nu' se lasemo vençer dal pecao, nu' semo vençaur de nu' meesemi. Unde eo voio che en sto fato vença la pietae. En quela nu' semo vençaure quando la pietà ne vençe, e quelui hè signore de tuto el qual hè servo de la misericordia. Unde meio hè ch'e' mora, salva la vita de quisti enoçenti, cha per la morte sua recovrare questa sanitae, la qual a la fine me convene perdere e no son anpo' certo s'e' la recovraroe. E manifesto hè che s'e' la recovrase, che 'la serave crudel sanitae. Unde voio ch'i fanti fia tuti rendui a le mare». He trovai fo chari he charete he cum doni multi fo remandai a le soe case. He cusì l'enperaur tornà al palasio soe he gi fanti a le tere soe fo portà. En l'altra nocte san Piero he san Paulo aparse en visione a Costantino he disige: «Enperçò che tu avise orore de sparçere el sangue enoçente, messer Iesu Cristo n'à mandai a ti per insegnarte como tu posi guarire. Unde manda toi messi a Silvestro papa el qual hè ascoso en monte Serapino. Questo te mostrerà un bagno en lo qual, sapoçao tre fiae, tu ensirà' sano da ogne enfirmitae. He tu en logo de questa gracia tu deventarai cristiano. Destrui le idole he edificha glesie ad honor de Cristo». Desveiao Costantino, el mandà gi misi soi per Silvestro. Veçù gi cavalere, Silvestro pensà de fir menai al marturio, unde el se comandà a Dio he confortà tutî conpagni. Vegnù Silvestro, l'enperaur levà su per elo he recevélo cum grande honore he dissige: «Ben sie tue vegnù», e Silvestro lo resaluà. Narà a Silvestro tuta la visione per l'enperaur he domandà qual era quisti dei, Silvestro respose: «Messer, igi no è dei ma hè apostoli de Dio». E mostrà per Silvestro a lo enperaure le soe imagene, alo' Costantino le recognosé he disse: «Quisti hè quigi chi me aparse sta nocte». Silvestro fé l'enperaure cathecumino he amaistràlo tuta una setimana, he félo çuna' he lasare tuti gi presonere cristiani he l'altri che no avese tropo gran pecao cometù. E vegnù l'enperaure al batesemo, quando elo entrava dentro el vene da cielo una gran luse he vete Cristo en questa ora, he ensì de la fonte mondo d'agne levra he pecae. En lo premiro dì ch'el fo baptiçao el dè questa leçe, che Cristo fiese abiù da tuta Roma per verasio Dio he aorao. [] El terço dì, che çaschaun che fesse ad algun cristiano ençuria el perdese la mità di ben soi. En lo quarto, che 'l veschovo de Roma fosse de tuta la glesia de Dio segnore sì como hè l'enperaore de Roma de tuto el mondo. En lo quinto, che çascauno chi fugisse a la glesia de Dio fuse seguro. En lo sexto, che nesun no posa hedifichare entro gi muri d'alguna çitae glesia alguna sença liçencia del quel veschovo. En lo septimo, che le deseme de le posessione de gi enperaure fiesse dae en gi edificij de le clesie. En l'octavo die el vene en lo logo hu' hè mo' la glesia de san Piero, he hiveloga cum lagreme s'acusà di pecai soi. He poi ço el designà gi fondamenti de la glesia he su le spale soe portà XIJ cunche de la terra del fondamento. Aldio ço Elena soa mare, la qual era in Ierusalem, per letere ch'el ge mandà, laudà multo el fiiolo ch'elo avea abandonao le idole e multo el represe de ço ch'el no creea en lo Dio di çuei mo erase metù ad adorare uno homo morto he crucifixo. E Constantino ge respose che 'la menase cum sie di gran maistri de la leçe di çuei he elo averave cum sie di savi cristiani açò ch'i desputase ensenbre he veesse qual fosse la drita fe'. Unde Elena menà cum sie CXLJ savisemi homeni di çuei en gi quali n'era XIJ che pasava gi altri en parlare he en siençia, e Silvestro vene cum gi clirigi soi a la disputacione enanço l'enperaure. Congregai tuti ensenbre de comuna voluntae, higi elese dui homini gi quali era pagani, che devese çuegare de la disputacione chi avese rasone. E fo entro le parte fermà questo, che stagandone un de lor en pei he parlando, tuti i altri tasese he seese. E lo promero di çuei levà su he disse: «Se voi volì dire che Cristo sia Dio perçò ch'el fé miraculi, multi n'è stai entre nu' ch'à fato miraculi plu de Cristo, che anpo' negun de quelur se fé ma' apelar Dio, pare e fiiol e Spirito sancto. E questo hè manefestomentre contra la leçe, la qual disse: 'Ve' ch'io son solo, he no hè altro Dio cha mie'». He Silvestro levà sue he respose ha Abiathar cusì: «Nu' cristiani adoremo un Dio, moe nu' no digemo ch'el

31, Giovanni ElemosiniereÇuane Lemosiner fu patriarcha de Alexandria he homo de gran pietae. Questui una nocte, stagando en oracion, vete una belitisima donçela starse enançi, la qual avea en cavo una ghirlanda d'oliva. Unde, maraviglandose de ço, el demandava chi ela era. E quela respose: «Eo sun la misericordia, la qual fi' vegnire Dio de çielo en tera. Unde tòime per tua sposa he averai bona aventura». E Çuane, sapiando che per l'oliva se signifacha le ovre de misericordia quel dì enanço deventà sì misericordievole ch'el dava tuto per Deo. He enperçò el fo dito Çuane Elemosinere, he gi poveri elo apelava soi signore; e da qua hà gi tenpleri che higi disse soi signuri. Questui clamà de quela fameia sua he dissige: «Anda' per tuta Alexandria he porta'me en scripto tuti gi segnori mei». E meraviandose quisti chi fosse en Alexandria segnur del patriarcha, el ge disse: «Quigi che vu' apelae poveri eo ge tegne per mio signore, ch'i ne pò dare el regno celestiale». Uno povero en abito de pelegrino vene a Çuane he demandàge elemosena, e elo clamà so expensaor he disse: «Va' he dà VJ grossi». E questo, recevua sta lemosena, andèsene he muao abito tornè ancora. E lo patriarcha disse al spensaure: «Va' he dài VI dinari d'oro». Andà questo via, el spensaure ge disse: «Pare, questo sì è pur quel de prima». E Çuane mostrà ch'el no l'avese cognosù. Venne questui la terça fia' abiando muà abito he demandà elemosena. E lo sencalco del patriarcha ge fé signo ch'elo era el primero. Ma el patriarcha, mostrando ch'el no l'intendesse: «Va', da'ge XIJ grossi, che forse Iesu Cristo mio signor me vol proare se questu' porà più tore cha eo dare». Un richo homo, veçando che 'l patriarcha avea en lo lecto soe vile drapi, conprà un richo covertore he mandàgelu. Abiando elo tegnù en quela nocte adoso el no poté dormire, digando: «Quanti poveri no hà çenà anchoi? Quanti en çase mo' en lo merchà a la plaça? Quanti per fredo mo' bate dente? Eo anchoi hoe mandegà gi pese he mo', en sta camera serao, hòne sovra mie un covertore che vale un grande avere. Certo lu humel Çuane no 'l tignirà adosso sta altra nocte». Fato lo die, Çuane fé vendere lo covertoro he dè gi dinari a gi poveri. Sapiuo ço lo richo, conpràlo ancora he mandàlo al patriarcha pregandolo ch'el no 'l vendeso plue ma tegniselo. E 'l patriarcha el fé vendere he dare gi dinari a povri. E aldio ço, questo richo homo ancora lo reconprà he mandàgelo digando: «Eo vederò chi vignirà de soto, au tu vendando au eo conprando sto covertore». E en questo mou lo patriarcha spulià un pocho questo richo. He disea Çuane che en questo mou, per voler dare a gi poveri porave l'omo cum bona consiencia tore de quel di richi no pechando, che dui bene n'avene: uno, che l'è bene a gi richi, l'altro che l'è utilitae di poveri. Un die, lecto lo vançelio, arguanti ensì de la glesia e lo patriarcha enssì comessu higi he metésse entro lor a seer. E meraviandose tuti de ço, el disse: «Hu' ch'è le pegure, hiveloga dé esser el pastore cum vue». Una fia' he doe fé cusì he endusse lo povol a stare en glesia. Stagando Çuane en oracione, el fo aldì spese fia' favelar cum Cristo he dire: «Cusì, cusì, bon Iesu, tu digandome he eo façando elemosena, veçamo chi vinçerà!». Vegnù elo a la hora de morire, el disse: «Eo te refferisco gracie, misser, che m'ae exaldio lo servo toe, el qual te pregava che quando el vignisse a morte tu no 'l lassase avere ultra un dinaro. E questo eo comando ch'el fia dao a gi poveri». Pasao el de sta vita, el fo metù en una sepultura hu' era dui vischuvi. Unde, fiando metù en sta sepultura, entrambi gi vischuvi ge fé lugo en meço de sie. Un gran tenpo enançi ch'el morise, una femena cometé un descunço pecao. E digando ella al patriarcha ch'ela no 'l confesarave mae, Çuane ge disse: «Scrivelo almen en una carta he saielala bene he poi me la da', he eo pregarò Dio che te perdone questo pecao». Andè questa he scripse lo pecao soe he, saielao bene, dègelo. Poi piçol tenpo lo patriarcha morie. Unde questa, aldio çoe e creçando che 'l pecao soe fosse vegnù a le man d'algun, andè a la sepultura sua he cum multe lagreme disea: «Guai mi, guai mi! Creçando scanpare conffusione eo sun vegnua en conffusione». E plançando disea: «Çuane, servo de Dio, mostrame hu' tu ae lassao lo scripto mio». He poi multe lagreme de sta femena, Çuane levà de la sepultura he vene aparao cum quisti dui vischuvi a questa femena he dissige: «Perqué ensesti tu cotanto né no lase né mi né quisti sancti vischuvi avere pase? Ecuti, le stole nostre tute hè bagnae da le toe lagreme! Tòi la toa carta he guarda ben s'ela hè saielaa sì cum tu me la desse. Avrila e liçi dentro». E questa, averta la carta, no ge trovà el pecà soe ma vite ch'el g'era scripto: «Lo pecà toe hè perdonaote per gi pregi de Çoane servo meo». E cusì questa referì gracie a Dio. E san Çuane cum i altri dui vischuvi tornà en la sepultura.

32, AlessioAlesio fo fiiol de Eufemiano nobelisimo romano, el qual era maiore apreso l'enperaur cha negun altro. Questo Eufemiano avea trea milia fanti vestij nobelmentre che avea le coreçe endorae he andavage ennançi. E era questo homo molto misericordievolo, unde en casa soa s'aprestava tri grande ordene de tavole en le qual mandegava gi orfani, le vedoe he i altri poveri che volea. He servioge, 'lo mandegava poi çircha la ora de nona cum religiose persone en lo temor de Dio. Aveva Eufemiano una moier la qual era altresì misericordievole he mare di poveri. E no abiando quisti algun fiiolo né fiiola, hige pregà Dio chi ge 'n dese. Unde, exaldì da Dio he nasùge un fiiol, higi ordenè entro sie de stare en castitae. E stagando en castità, hi meté lo fiiolo a scola, he abiando enpreso bene he vegnù ha etae legitima, el ge fo dae en sposa una parente de lo enperaur. Vegnua la nocte che gi dovea esser ensenbre, Alexio començà d'amaistrare la moier sua de sanctitae. E poi ço, el ge dè lo so anelo he lo cavo de la coreça sua ge dè ch'era d'auro, he dissige: «Tòj queste cose he servale bene de chi a ch'el plaserà a Dio, he lo segnor sea cum nue». E poi de note ocultamentre he' tule arguanti [] he [] de Roma []. E entrà en nave, el çonse en Laudacia. He de Laudacia l'andè ha una çità de Siria la qual fi dita Edissen, là hu' era una imagene del nostro signor Iesu Cristo en un bel drapo blancho facta da Dio. E chialoga el se meté a stare çircha la glesia de la vergene Maria. He vendui gi drapi begi, vestìse de drapi vile he dè ogna cosa per Dio. Vivando ello de lemosene, tuto quelo chi g'avançava ello el dava a i altri poveri. El pare mandà missi quasi per tuto 'l mondo çerchando questo so fiiolo. Unde, vegnui di missi del pare in Edisea hu' era Alexio, el gi cognosé bene mae no fo cognosù da higi. E reçevua lemosena da quisti, el disse enfra sie: «Eo te referischo gracie, Dio, ch'i' ò reçevù elemosena da mei servi». Tornà gi missi d'ogne parte, çaschaun disse ch'i no l'avea posù trovare. Unde en gran dolor era lo pare, la mare e la moiere, he consolare no se poea. E la mare, da poi che Alex io se partie, meté un sacu sul solare soe digando: «Sempre starò chialoga de fina ch'io saverò novele del mio dolçe fiiolo». E lla sposa de Alexio disse a la soxera: «Eo senpre starò cum tie sì cum una turtora solitaria enfina ch'io aldirò novele del mio dolçe sposu». Stà Alexio XVIJ agni en lo servixio de Dio soto 'l portegal de la glesia de Dio, [] disse al custodo de la glesia: «Fa' entrare en la glesia el servo de Dio ch'el n'è digno d'avere vita eterna, e le oracion soe è muntà a Dio sì como l'ençenso». He digando el custou: «Chi è questo homo de Dio?», la vose disse: «Quel che sta soto el portegale de la glesia», unde lo custou de la glesia andè e menàlo en la glesia. E seando questa cosa manefestaa, tuta çente avea Alexio en reverencia he faeage grande honor. Unde, no voiando el servo de Dio questo honore, partìsse he vene ha Laudacia. Volea andare en una terra de Çelicio ma, no voiando Dio, el ave 'l vente contrario he vene al porto de Roma. E veçù ço, Alexio disse enfra sie: «Eo starò en casa de mio pare he no darò spensaria ha altri, he anpo' el no me cognoserà». Vignando el pare cum grandissima compagna, Alexio l'ave encontrao he començà clamarge drio: «Servo de Dio, recivime en casa toa he fa'me dare le freguie che romane su le toe mense açò che Dio abia misericordia del to peregrino fiiolo». Aldio questo lo pare, el lo reçevé he dège un çerto lugo da stare en la sua casa. E Alexio, stagando chialoga, cum molte çunij, vigilie he oracione afliçia el corpo soe. Gi fanti de la corte ge spandea l'aqua adoso he disiage vilanie, mae Alesio tuto en pase portava per amor de Cristo. E cusì vivando, stete en casa del pare XVIJ agni. Veçando el ch'el s'apropinquava la fine sua, el se fé dare una carta he enclaustro he scripse tuta la vita sua, cum el era andao, vegnuo he stao. Poi ço, en un die de domenega, conplia la mesa, el vene una vose de çielo aldando tuta çente he disse: «Vignie a mie tuti vui che ve affaigae e sie encaregai he eo ve reposarò». E aldia sta vose, tuti se butà en terra da paura. E ecuti, la segunda fia' la vose disse: «Çerchae lo servior de Dio açò ch'el prege Dio per Roma». Çerchando sta çente he no trovando questo servo de Dio, el venne ancora la vose da çielo he dissige: «Çercha'lo en casa de Eufemiano he demanda'lo de sto homo»; e 'l disse ch'el non savea alguna cosa. En questo [] Archadio he Honorio enperaure cum Enoçencio per çerchare questo servo de Dio. E un di fanti de Eufemiano dissige: «Misser, guarda' ch'el no sea quel peregrino che abita cum nu' ça hè cotanto tenpo, che elo hè homo de gran vita e sancta». Unde Eufemiano corse lae, he ecuti, el çasea morto; luxeage la faça sì cum un ançolo de Dio. E volsege tore una carta la qual el tegnia en mane ma no poté. Unde tornà a lo papa he a gi enperaure he dissige sto fato. E gi enperauri andè al corpo he dissige: «Quamvisdio che nu' no siamo digni, nu' tegnemo lugo de gi signori del mondo, he questo ancora de tuta la glesia de Dio, unde da'ne questa carta açò che nu' la leçamo». He andè lo papa da elo, e Alexio alo' avrì la mane he lasàge la carta. E abiandola, el la lese enanci ogn'omo. Aldio Eufemiano che l'era el fiiolo, el strangusà he caçì en terra. E tornao un pocho en sie, el començà squarçare le veste soe, ha scaviarse, he plançando dire: «Oimè, fiiol mio! Perqué me abandonasi tu he cotanti agni m'à' fato doloroso he gramo? Oimì fiiol dolçe, ch'e' te veçe çasere su sto vil leto he no poerme favelarme! Doloros mi, que consolacion pos' e' omai avere?». La mare, aldie queste cose, venne cum una lionesa ch'avese rota la caena, tuta scaviada, batandose he digando: «Homini, daeme lugo he fa'me via ch'e' possa veder he tocar lo mio fiiolo!». E vegnua al corpo, butàse sovra el, digando cum lagreme: «Oimè fiiolo dolçe, perqué n'ae tu fato cusie? Perqué èi tu stao cusì cruel contra mie? Tu veive lo pare toe he mie plançer asa' fiae duramentre, he anpo' no te manifestave tu!». E mo' se volçea da pei, mo' dal cavo, mo' levava en pei, mo' se butava sovra el corpo digando: «Plançì cum mie tuta çente, che per XVIJ agni el fiiol mio è 'l stao en casa mia he eo no 'l cognosea! Gi mei servi lo feria he diseage desenore! Oimè, chi darave a i ogli mei

33, GregorioGregorio fo nobilisimo homo de Roma de sclata de senaure. Lo pare soe ave nome Guardiano he la mare Siloia, he fo filosofo grande. Questu', morto lo pare, fondà VJ monisteri en Çiçilia del patremonio soe he lo setan fé en Roma en onor de santo Andrea. E abandonai honor mondani he richeçe, çé a servire a Dio en questo monestero. En breve tenpo, orando, veiando, vene a gran santitae. Tanto afliçé el corpo soe ch'el vene in continua enfirmitae del corpo soe he en defeto del core, sì che spese fiae el parea morire. Homo fu de grande humilitae, de gran conpasion a gi poveri. Una fia', stagando el en lo monester soe he scrivando, el vene l'ançel de Dio ha elo en forma d'uno che fosse sopeçà en pelago he demandàge lemosena cum lagreme, e elo ge fé dare VJ dinari d'arçento. Andao via, el tornà quel meesimo die çircha vespro he domandà ancora elemosena, digando che multo avea perdù he poco ge fiea dà da la çente. E Grigoro comandà ch'el ge fiese dao ancora VJ grossi. Lo terço die, el fo çunto ancora he domandà lemosena. E Gregoro, demandà lo procuraur, disse ch'el ge desse ancora qualche cosa. E 'l procuraur disse: «El no g'è che se possa dare, se no una scuela d'arçento ch'è de vostra mare, la qual ela v'è usà de mandare cum legume bagnao». E Gregorio disse: «Seage daa alo'!». Un die, andando per la plaça de Roma, el ave veçù arguanti fanti, gi quali avea cavigi blundi e era beletisimi he honeste persone, esser a vender. Unde el domandà el merchadante de qual provinçia el gi avea menai. E 'l respose: «De Britanea, hu' comunalmentre tuta l'altra çente hè cusì blanchi he begi». E Grigoro disse: «Ègi cristiani?». E 'l merchadanto disse: «Messer no, ma èn volti en gi erore di pagani». E Gregoro çemando disse: «Oimè, dolor grande che 'l diavol hà posança sovra così bele façe!». E demandà ancora como fiea apelaa quela çente, e lo merchaente disse: «Hi fi diti anglici». He Grigoro: «Ben pò fir diti anglici quasi ançeliçi, enperçò ch'i à vulti he façe d'ançeli». Domandà ancora como fiea apelaa quela provinçia. He lo merchadanto: «Hi fi diti Dehiri». E Grigorio: «Ben fi diti Dehiri, che igi hè da fir trati fora de l'ira de Deo he de poestà del demonio». Recherì anchora: «Como hà nome el so re?». E 'l merchadanto: «El fi dito Ellee». «He mister fa che en quel regno se cante aleluia». E poi ço, Gregoro andè al papa de Roma el qual avea nome Sisinio he pregàlo ch'el ge plassese de mandarlo en Britania per convertire sta çente. Ma perché utele era multo en Roma, a gran pena ge 'n dè parola. Metù en via per andare en Bertania, gi romani, aldio ço, fu turbai. Unde andè al papa he dissige: «Offendù ài Peru, Roma hè destructa e Gregoro lasao andare via». Unde lo papa, aldio cusie, mandà missi viaço poi ello ch'el en ogne mou tornase. Abiando ça Grigoro fato tre çornae de la via sua he stagando mo' a leçer en la via, el vene una lochusta e félo enterrunper el leçer cum sua enquetudene. Unde el vete per revelacione he quasi dal nome de sta bestiola ch'el no poea conplire la via sua ma convignivage stare en logo, ché tanto sona a dire 'logusta' cum 'en lugo sta'. He dito sta revelacione a gi conpagni, hecuti gi missi del papa çunse he félo tornare endrio an' desplasese 'l multo a Grigorio. Vegnù el en Roma, el papa el fé gardenale çagano he voselo avere cum sie en corte. Poi un tenpo, cresando lo Tevaro sì che l'andava ultra gi muri de Roma he destruse case asae, el venne una gran moltitudene de serpenti morti çó per lo flume he amorbà sì l'aier tuto che çente ultra pacto morie en Roma. Unde, morto el papa, el povol a vose fé Grigoro. E vegnù el die ch'el dovea fir consecrao, hel preichà al povol he ordenà una procesion en la qual ogn'omo pregase Dio che sta mortalità çesase. He seando tuti en sta procesione he pregando Dio, el vene la plaga sovra la çente sì grande che en quela ora octanta homini morì. E elo ancora començà confortare la çente che no cesase de clamare marçé a Dio enfina che la pestilençia cesarave. Finia sta procesione, el volse ensir de Roma ma non poté en parisente, enperçò che tute le porte de Roma fiea guardae perch'el no fuçisse. Unde el muà abito he fésse portare en una veça fura de Roma. E alo' como el fu ensie fora de la veça, el s'ascose en le caverne he tri die stete occulto. Ma per voluntà de Dio el aparse sovra quel lugo là o' el era una colunpna de fugo, per la qual un remito vete i ançeli desmontare sovra Grigoro. Unde lo povol corse lae he preselo he félo consecrare en pastore de la glesia de Dio. Fato papa he veçando ch'el no cesava la pestilencia, el fé ancora fare procesione çircha el tenplo de la resuresione he fé portare enançi la procesione una ymagine de la vergene la qual enpençé Luca 'Vangelista. Ecuti, la corupcione de l'aiere he la pestilençia dava logo visibelmentre ha la imagene he lo tenpo [] belo. E fo aldio cantare a pe' de la imagene queste parole: «Raina de çelo alegrate, aleluia, che resusitao hè quel tu fusi degna de portare». Sì cum el disse: «Aleluia», e Gregoro alo' g'açunse: «Ora per nue, pregemo, aleluia». E en quela ora vete Grigorio l'ançel de Dio sovra 'l castel de Cresenço, el qual hè sovra una de le porte de Roma, forbire una spaa tuta cruentà he meterla en lo foro. Unde Grigorio entendé che la pestilencia cesava. He da chi enanço questo castelo fi apelao Castel de l'Angel. Cesaa la pestilencia, el mandà en Bertania Augustino, Melleto he Çuane cum altri plusore, he per gi meriti, per gi pregi de san Grigorio, Dio convertì quela çente a la fe' cristiana. El fu de tanta pietà he largeça che no pur a quigi poveri chi era en Roma el dava lemosena, ma etiamdie a quigi de lonçi. Unde a gi moneghi chi era sul monte de Sinai el mandava gran beneficij. El avea enscripto gi nome di poveri tuti, he bene a trea milia ançille de Cristo minstrava lemosena. A la mensa sua avea di poveri ogni die, unde un dì el reçevé un pelegrino he, voiando darge de l'aqua a le mane sì cum el era usao, el se volse per tore l'urço. He quando el fo vulto per darge l'aqua, el no l'aretrovao. Unde, meraviandose el de sto fato, Cristo g'aparse la nocte en visione he disige: «Le altre fiae tu m'ài reçevù en le mie menbre, ma eri tu me recevise en la mia propia persona». Digando el messa en la glesia de Sancta Maria Maiore, hu' hè quela ymagene de la vergene la qual fé san Luca, quando el disse: «Pax domini sit senper vobiscum», un ançelo ge respose ad alta vose, aldando tuta çente: «Et con spiritu tuo». Unde en memoria de sto miraculo, quando el papa disse mesa en sta glesia en lo dì de pasqua, digando el: «Pax domini sit senper vobiscum», el no ge fi responduo. Traiano enperaur un dì andava cum la cavalaria sua en gran presa per la plaça de Roma ha una hoste contra gi enemisi, e una vedoa a chi era morto malamentre el fiiolo ge fo encontra he dissige: «

34, BernardoBernardo fo de Bergonia, fiiol de Thecelimo nobel chavaler he de Aletha sancta he nobel dona. Questei portà VIJ fiioli masculi he una femena e fu tuti muneghi e la fante monega. Sì cum sta dona enparturia algun fiiolo, ella cum le man soe l'offeria a Dio e no volea che altra femena lactase gi fiioli soi, unde cum la lacte sì ge enfondea gi soi boni costumi he quasi de la bontà sua. Quando hi cresea un pocho, de chi a ch'i era en sua mane, ela ge nurigava de cibo comuni he grossi, sì como higi dovese andare alo' a stare en religion. Seando ela gravia del terço fiolo, çoè de Bernardo, ela s'ensonià d'avere un catel blanco tuto he sul doso roseto el qual ge latrava stagando entro el ventre. Unde, dito sto sonio ha un leterao homo, el ge disse: «Sta' seguramentre che tu serà' mare d'un bonitisimo fiiolo el qual serà bon guardiano de la casa de Dio. E avrà contra el diavolo gran braçi, e cum lo benefiçio de la soa lengua salverà multe anime he serà nobel preicaure». Seando Bernardo ancora fante he abiando gran dolor de cavo, una veia vene a ello per volerlo pergantare, he elo cum clamor la caçò via no voiando cotal sanità. Ma Dio per la misericordia soa ge mandà la meesina sua, unde el fo alo' guarì he levà sue. En la nocte de Natale, aspetando Bernardo matino he abiando gran desiderio de savere en qual ora de la nocte nasé Iesu Cristo, el ge aparse lo fantinelo Iesu sì cum el nassese pur moe del ventre de la vergene. He da quela ora enançi Bernardo ave gracia de parlare he de scrivere de quel che pertene a la natività de Iesu he de le lause de la vergene Maria. Veçando lo diavolo lo disiderio de Bernardo he lo proponimento de la sua castitae, el g'ave envidia he metége asai laçi per farlo chaçire. Unde una fia' per enstigamento del diavolo el meté gi ogli en una femena plu ch'el no dovea, ma per la gracia de Dio el n'ave pentisone he vergogna en sì meesemo. Unde el se butà en un lago fredisimo he tanto tenpo ge stete ch'el se refredà he quasi ge manchà per fredo. E cusì per la gracia de Dio el se refredà tuto da l'ardore de la concupisençia carnale. Piçol tenpo poi ço, seando Bernardo en un leto de nocte, una fante se meté nua en lecto cum elo. E elo, quando el la sentie, cum silencio he ogne tranquilitae se volçé en l'altra parte del lecto he començà dormire. E questa, aspetao un gran tenpo, veçando ch'el no se movea né enclinava ha ela, cum gran vergonçia he temore ela se 'n partie. Seando elo un'altra fiaa en lo albergo d'una matrona, veçando la beleça sua ela ge fé aprestare un lecto desparto da gi conpagni soi he, facta la nocte, ela ascosamentre se meté en lo leto cum Bernardo. Ma el, alo' cum el la sentì, crià: «Larone, larone!». A questo remore la femena levà sue, enpigià la luçerna he començà çerchare gi larone. E no trovandogi, tuti tornava a dormire. Ma posando i altri, questa no posava. Unde ela levà su he vene â lecto de Bernardo, he el ancora crià: «Larone!», no voiando manifestarla; quigi de la fameia levà su he no trovà el laro. Ancora tornai a dormire quisti, ela vene la terça fia' he metésse en lo lecto cum Bernardo. Ma criando ancora elo, questa se partie he no ge tornò più. La domane, seando gi conpagni cum Bernardo en via, hi lo demandae he reprendea de ço che cotante fiae el ave sopniao gi larune he aveage enquetai. Elo respose: «Verasiamentre eo en questa nocte eo sun stao en perigulo, ché la nostra hosta me volea envolare la castità mia la qual per thesauro no se pò mai conprare». Veçando Bernardo ch'el no era secura cosa abitare cum gi serpente né stare en lo mondo, el començà de tratare d'abandonare el mondo he entrare en l'ordene de Çistello. Cognosando ço, gi fraegi soi hi començà retra'lo en quanto hi poea, ma tanta gracia Dio ge donà che no pur solamentre el g'entrae, ma trasege tuti gi fraegi soi he multi altri. He preichando Bernardo, el frael so maiore chi era un valente chavaler he avea nome Girardo, elo avea le parole soe per niente. Unde Bernardo, sì como abrasao de l'amor de Dio, ge disse: «Eo so, frael mio, che solamentre la tribulacione te farà fare quel und'eo te prego». E metuoge el dito soe al flancho, el ge disse: «El vignirà, he tosto vignirà, quel die en lo qual una lança ferirà en questo lugo he darà via en lo to core a quel consio che tu despresio moe». Poi no multi die, Girardo fo preso da gi soi enimigi he ferio en lo flancho d'una lança he metuo en presone. Bernardo andè per favelarge he, no siando lassao andare a lui, el vegnando de fora disse: «Sapij frael Girardo che 'desu provo sic nu' entreremo en religione ensenbre». En quela nocte miesema le ferie ge caçé da le ganbe he l'usso de la presone fo averto da l'ançelo. He Girardo alegro se 'n partie he, vegnuo a Bernardo, el ge disse ch'el volea deventare munego. Curando mille çento he XIJ agni da la encarnacione de Cristo he seando XV agni da che era fundà la casa de Cistel ben cum XXX conpagni, e una fia', ensando Bernardo cum gi fraegi soi facti frare de casa del pare, un di fraegi, veçù el frael so menore ch'avea nome Nivardo, el qual romagnia al mondo, çugare cum gi fanti en la plaça, el ge disse: «Frael Nivardo, a ti sì romane tute le possesione de casa nostra». E lo fante no puerilmentre ge respose: «Averì vu' tuncha vu' el çielo he eo la terra? Questa no serave bona partia». Unde poi piçol tenpo elo andè drio a gi fraegi. Entrao Bernardo en religione, el fo sì absorto tuto dal spirito ch'el no parea quasi avere gi sinni del corpo. Unde, stao el tuto un anno en la çela sua, el no savea se 'la fosse testudiaa de pria. Andao he ensuo asae fiae per la glesia del monester, seandoge tre fenestre de cavo el credea ch'el ge 'n fosse pur una sola. L'abae so, voiando edificare la casa de la Claravale, sì ge mandae di frare soi, he sovra lor per abae meté Bernardo. Unde, vegnù en Giraval, el vivé en gran povertà un gran tenpo cum gi frare soi sì che multe fiae igi cosea el magnare soe cum foie de façaro. Veiava lo servo de Dio ultra la posibilitae humana e disea ch'el no era gramo de la percea d'algun tenpo tanto cum de quel en lo qual el dormia, digando che verasiamentre lo sonpno e la morte era semiente cose. Unde, s'el trovava algun di frare runcheçare au no cortese he honestamentre dormire, el no 'l portava bene en pase he disea che quelui dormia segularmentre. A mandegare de raro andava perch'el n'avesse voluntae ma per paura de no desomentire. Così andava al çibo como altri andarave al tormento. E da poi ch'elo avea mandegao, el pensava alo' se l'avea pasao el mou, he s'el trovava ch'el fose abiù tropo el ne fasia penitencia. Unde cusì avea vennta la gula ch'el [] mandegava. E enperçò el bevé plusor fiae olio en lugo de vino, he no 'l cognoscé enfina che un frare no ge disse perqué ello avea gi lavri onti da olio. El era usao de dire che solamentre l'aqua ge savea bona, enperché quando el la bevea 'la ge rafrigerava el glutaur. Tuto quel che l'ave enparao de la scriptura sancta, el disea ch'el l'avea enparao en le selve he en gi buschi, pensando che maistri soi era stai gi rovere he gi façari. Un tenpo Dio ge meté enançi tuta la scriptura sancta exponua. En le vestimente soe senpre ge plascé povertae ma no